A Xunta reduce un 10% as bolsas para cursar inglés noutro país

As estadías no estranxeiro para aprender idiomas son un dos clásicos do verán para moitos estudantes. Porén, nin as empresas que se encargan de xestionar estas actividades lograron escapar á crise. Cifran entre un 20 e un 40% o descenso no número de mozos que envían fóra, feito que atribúen á situación dos fogares galegos e á redución das axudas da Administración.

A Xunta de Galicia enviará un 10% menos de bolseiros que no 2008 a destinos como Canadá, Reino Unido, Irlanda ou Francia, namentras o Ministerio de Educación convocou case un 20% menos de axudas que hai dous anos para mestres e estudantes que queiran cursar linguas fóra. Segundo Elena Romero, propietaria da empresa de Vigo Over The Rainbow, a conxuntura económica estáse notando no sector. “Afecta aos pais, que son os que pagan. Aos máis novos estanos enviando menos semanas ou directamente non van. Ademais, hai menos bolsas e mesmo alumnos aos que llelas deron e que renunciaron a elas porque logo teñen que pagar os gastos”, di. “Por outra parte, subiron os voos e non se conceden créditos, porque moita xente viaxa así”, engade.

A propietaria desta axencia sinala que moitas familias optan por academias dentro do Estado e que os universitarios tratan de buscar colexios máis baratos e de organizar as viaxes pola súa conta, aproveitando aloxamentos de coñecidos.

Over The Rainbow xestiona este verán 300 estadías, un 40% menos que no 2008. Nesta empresa, a contracción notouse especialmente nos estudantes máis novos, que no caso de viaxar subvencionados teñen todos os gastos cubertos –hospedaxe, comida, actividades e curso–. Segundo Romero, adoitaban ser o 50% dos que escollían estes servizos, pero agora representan o 30%.

Ana Usieto, copropietaria de Feedback Galicia, cifra nun 20% a redución dos viaxeiros e puntualiza que “os que teñen bolsa miran moito os presupostos, xa non lles preocupan as prestacións, só o custo”. Tamén María Eugenia Alende, directora de Alphabets, explica que captaron un 30% menos de estudantes.

TIPO DE VIAXESTipo de viaxes

En xeral, unha viaxe destas características custa entre uns 850 e uns 1.500 euros para tres semanas, aínda que no caso dos alumnos máis novos, o orzamento pode acadar os 1.700, xa que contan con supervisión ou recollida no aeroporto.

Namentras Alemaña, Francia ou Italia seguen a ser destinos residuais, Dublín, Inglaterra e Londres mantéñense como os máis populares. Porén, os veteranos destas viaxes están comezando a explorar novas opcións, polo que Nova York, Malta ou Australia están en auxe.

María Fernández, de 21 anos, estudante de Dereito, viaxará a Liverpool este ano. Conta cunha beca de 1.700 euros do ministerio, aínda que coida que precisará máis cartos. Segundo di, unha das principais eivas do programa é que “tes unha semana para xestionar todo dende que sabes que che conceden a bolsa”. Pola contra Mónica Armesto, de 22, quedou sen axuda este ano. É o primeiro dende hai catro que non viaxa. “Creo que este ano primaron aos que nunca foron, e ademais xuntaron aos de bacharelato e universidade e reduciron as prazas”, lamenta.