Cultura quere dotar o CGAC de entidade xurídica para gañar eficiencia

A Consellería de Cultura presentou onte no Consello da Xunta o informe sobre a dotación de personalidade xurídica propia ao Centro Galego de Arte Contemporánea (CGAC), co obxectivo de lograr unha “maior eficiencia e eficacia” na súa xestión.

Segundo afirmou a Xunta, a modificación da natureza xurídica do centro pretende “flexibilizar as súas posibilidades de actuación” de cara a “fomentar a investigación científica, mellorar o servizo aos visitantes e incrementar os recursos financeiros propios”. Segundo o informe, dotar o CGAC de personalidade xurídica propia daralle “maior axilidade” para “adecuarse ás distintas circunstancias e ás necesidades dos visitantes” e ofrecer “un servizo de calidade”.

Do mesmo xeito, obrigará os representantes do centro a unha “implicación máis esixente na súa xestión económica e administrativa”, implantando un sistema de avaliación de resultados a partir da definición de obxectivos estratéxicos, formalización anual de acordos ou contratos e desenvolvemento de indicadores “sinxelos e de doado manexo”.

XERADOR DE 'MERCHANDISING'

Para Cultura, o CGAC debe funcionar como “núcleo xerador de actividade económica” a través de fórmulas como “a busca de patrocinadores ou unha diversa oferta comercial de produtos”.

Así, a nova configuración servirá para “dinamizar a obtención de fontes alleas de financiamento” e “dinamizar os propios recursos”, como a cafetaría e o merchandising. Ademais, establece a necesidade dunha “reformulación xeral de todas as facetas que rodean a vida dos museos” ante “o crecente interese polas manifestacións culturais”.