A Deputación de Ourense edita un libro sobre a gaita en catro linguas, pero ningunha é o galego

A Deputación de Ourense publicou, no verán pasado, un libro sobre a historia e as formas da gaita ao longo do mundo no que o texto aparece en alemán, castelán, inglés e francés, pero non en galego, segundo denunciou a Asociación de Gaiteiros Galegos (AGG). Para Xoán Manuel Tubío, membro da directiva da AGG, La gaita. Imágenes para la historia de un instrumento popular europeo, obra do alemán Fritz Schneider, editado pola Escola Provincial de Gaitas, é un “traballo excelente, con iconografías de gran valor, pero non se pode entender que marxine a nosa lingua”.

Xosé Luís Foxo, director da escola ourensá e responsable directo desta publicación, responde que lle tería gustado “editalo en galego, pero non tería sentido, porque é un libro que se está a distribuír en toda Europa, e o propio autor quixo que estivese nas catro linguas máis faladas do continente”. Engade, tamén, que recolle gaitas de máis de cen países europeos, “entre as que se menciona a gaita galega, si, pero tamén a serbia, e non por iso vai en serbio”.

Pola súa banda, Tubío expón varios motivos polos que a obra si que debería estar en galego. Primeiro, porque “está pagada cos impostos dos ourensáns”. Segundo, “porque o contrario supón disociar a nosa lingua da súa cultura tradicional, no que semella un novo avance máis na ofensiva que está a liderar o PP dende que regresou á Xunta”. E terceiro, “porque xa feito o esforzo de sacalo en catro linguas, non se entende que molestia lles supuña unha máis”. Na súa defensa, Foxo asegura que xa foi moi complicado a nivel de maquetación encaixar nas páxinas catro versións do texto, unha en cada lingua. “Non era posible introducir un quinto e, que iamos facer, prescindir do castelán?”, argumenta.

Engade ademais, que “non ten problema en publicar as cousas en galego”, e que o propio Fritz Schneider ten contribuído con varios textos ao Anuario da Gaita da Escola Provincial de Ourense, “que sempre apareceron traducidos ao galego”. Pero, neste caso, insiste en que non era procedente incluír a lingua propia do país.

Dende o BNG de Ourense, Xosé Manuel Fírvida lamenta que “a Deputación abandonase a actitude impecable cara ao galego que mantiña ata o de agora, e se deixase influenciar polas políticas hostís da Xunta”, e asegura que a súa formación interrogará a insitutición provincial sobre os seus motivos no vindeiro pleno, o día 29 de xaneiro.