Bello Janeiro fala en Almería das leis sobre os transxénicos

XORNAL I Santiago.- Bello Janeiro destacou a importancia de dotar dun marco regulamentario sensato e eficaz á comercialización dos transxénicos, tendo presentes na súa elaboración as preocupacións da poboación e os intereses da industria, co obxectivo de obter niveis de calidade máis altos nestes productos e, ó mesmo tempo, minimizar riscos.

Domingo Bello subliñou que a normativa sobre os organismos modificados xeneticamente vai incidir en aspectos tan relevantes para a sociedade como o desenvolvemento da ciencia, a defensa da saúde humana e o medio ambiente, a liberdade científica e de empresa, a competitividade, a propia estructura do tecido industrial español e europeo, as conviccións morais das nosas sociedades ou os nosos propios hábitos alimentarios e de consumo.

Neste sentido, o catedrático coruñés salientou o gran avance que supoñen ó respecto da maior seguridade alimentaria os regulamentos europeos sobre etiquetado e trazabilidade de productos transxénicos, que entraron en vigor esta mesma semana, e que obrigan ós productores de alimentos procedentes de organismos modificados xenéticamente a indicar esta orixe na súa etiqueta, garantindo o dereito de información dos consumidores. Explicou que o obxectivo último do novo marco legal "é que o consumidor poida elexir e rexeite, se o considera conveniente, os polémicos alimentos alterados xenéticamente".

Este simposio da Universidade de Almería forma parte dun proxecto de investigación subvencionado con fondos da Unión Europea que versa sobre "Aspectos legais da agricultura transxénica", ó que pertencen como investigadores, xunto con Domingo Bello, prestixiosos profesionais e académicos de diversas universidades da xeografía española que impartirán as súas conferencias na Universidade andaluza.

Entre os relatores deste congreso e integrantes do proxecto investigador figuran, ademais do catedrático herculino, Ramón Herrera Campos, catedrático de Dereito Civil e secretario xeral da Universidade de Almería; Lorenzo Morillas Cuevas, catedrático de Dereito Penal da Universidade de Granada; José Antonio Cobacho Gómez, catedrático de Dereito Civil e decano de Dereito da Universidade de Murcia ou Yolanda Echeverría Lagares, bióloga e xerente da Unidade de Biociencia do Clarke Modet & CO. Tódalas conferencias destas xornadas recolleranse nun libro que se enmarca no citado proxecto de investigación sobre productos transxénicos aprobado polo Ministerio de Ciencia e Tecnoloxía e subvencionado pola Unión Europea.

---
Más información: España: Xornal.es Galicia: Xornal.com