BNG e CIG propoñen deseñar unha estratexia de defensa do naval galego

XORNAL I Santiago .- Lobeira (que acudiu á xuntanza acompañado do secretario de Organización do BNG, Luís Barcia, e do deputado nacionalista no Parlamento galego Xosé Díaz) denunciou que a situación deste sector se converteu en “problema con dimensión nacional, en termos de discriminación do país”.

O BNG opina que se trata dunha situación que hai que vencer politicamente, dado que o país conta “coa tecnoloxía e a capacidade produtiva” para sacar o sector adiante e por iso quer que “a sociedade reivindique o dereito a vivir do traballo”. Pola súa parte, o secretario de Acción Sindical da CIG, Antolín Alcántara debuxou unha situación na que “desaparecen as plantillas, pechan as instalacións e grande parte do traballo que facían os estaleiros galegos se contrata a terceiros países”.

Alcántara lembrou que o principal é defender o sector e os postos de traballo, o que, na súa opinión, non está a facer o Estado español.

Neste sentido, Bieito Lobeira opinou que tamén a Xunta “debería ter un papel máis reivindicativo”, ao tempo que asegurou que o BNG bota “en falta unha posición de defensa do sector naval por parte do goberno galego.

BNG e CIG explicaron as mobilizacións forman importante parte do proceso de reivindicación que inician este venres, aínda que matizaron que, antes de anunciar as medidas que se tomarán, queren poñer en común as propostas de todos os colectivos.

---

Más información: España: Xornal.es Galicia: Xornal.com