O servicio de Portelo Único funciona en preto de 300 concellos galegos

XORNAL I Santiago .- Ca adhesión destes concellos ó convenio de colaboración que, en Febreiro de 1996, suscribiron a Consellería da Presidencia e a Federación Galega de Municipios e Provincias (FEGAMP) para a implantación e desenvolvemento dos servicios informáticos e de telecomunicacións, a partir de hoxe, martes, serán xa 296 os concellos galegos que disporán do servicio de Portelo Único.

A través do devandito convenio, a Consellería da Presidencia, Relacións Institucionais e Administración Pública intensifica a cooperación cas administracións locais e pon ó seu servicio a rede privada de comunicacións da Xunta de Galicia, co obxecto de mellora-los servicios ós cidadáns.

QUE SERVICIOS OFERTA.- A implantación do portelo único nos concellos galegos permite exercer varias funcións entre as que figuran proporcionar información xeral da administración autonómica; información particular sobre aqueles expedientes administrativos tramitados a instancia de parte ante a Xunta de Galicia, nos que o solicitante sexa interesado, nos termos establecidos pola lei; ou acceso ó Rexistro Xeral de Contratistas da comunidade autónoma.