A Fundación Carlos Casares acolle un Obradoiro de Escritura para Inmigrantes

XORNAL I Vigo .- No acto de presentación intervirán Pedro X. Blanco Llano, xerente da Fundación Carlos Casares, e Carmen Sampedro, directora do Obradoiro, xornalista e escritora de orixe bonaerense afincada en Vigo dende o ano 2002, que concentra a súa actual actividade profesional nos problemas das mulleres e o universo da inmigración, materias sobre as que dirixiu obradoiros e impartiu conferencias.

O motivo deste obradoiro está na necesidade común que persoas de diversas orixes teñen de expresarse mediante a palabra escrita, contando experiencias e sensacións como forma de esclarecer e reinterpretar os sentementos complexos que agroman co cambio cara unha nova vida, polo que precisan das ferramentas literarias e a orientación para contar de xeito acaído o que se pretende expresar.

Nas diferentes xuntanzas que se sucederán, transmitare o coñecemento dos diferentes xéneros literarios e a súa evolución, facendo aportacións para o debate dos microxéneros, estimulando a capacidade de síntese, seleccionando a información e impulsando a que cada participante atope a súa propia expresividade, ton e estilo á hora de escribir.

Entre os obxectivos deste ‘Obradoiro de Escritura Creativa’ está o de promover o intercambio de historias vividas e axudar a expresarse mediante a escrita, así como afortalar a autoestima dos inmigrantes, a miúdo crebada polos dolos, as perdas e a presión de se establecer nunha sociedade allea que, aínda aberta e xenerosa, non aminora a certidume de ser extrano nela nin o desafío dun longo camiño por percorrer para se integraren.

A inscrición no Obradoiro, que terá lugar todos os xoves dos meses de marzo, abril, maio e xuño ás 19.30 horas na sede da Fundación Carlos Casares, é de balde e emitirase un certificado de asistencia ao remate do mesmo.