Os nacionalistas aspiran a que Cámara Galega sexa máis "viva e áxil"

XORNAL I Santiago de Compostela.- O portavoz e viceportavoz do grupo parlamentar do BNG, Carlos Aymerich e Bieito Lobeira, apresentaron esta mañá en rolda de prensa as liñas políticas que os nacionalistas levarán adiante no período de sesións que se abre esta semana. Os parlamentares anunciaron o impulso a medidas “de carácter estrutural” en eidos como o rural galego, a ordenación urbanística e os horarios comerciais, entre outros.Pola sía banda, Aymerich aclarou que o seu grupo apoiará as medidas impulsadas polo goberno nestes eidos e impulsará tamén liñas de traballo parlamentares con obxectivos como “a reforma da lei do solo” que, segundo lembrou, “é urxente” e afecta a cuestións tan diversas como a inexistencia dun rexistro de terreos forestais queimados a ter en conta á hora de evitar a súa recalificación.

Lobeira falou do afianzamento da reivindicación de Galiza que fai o BNG e lembrou que os nacionalistas non teñen “ningún pacto político co goberno español”, polo que insistíu en que “existen actuacións do goberno estatal que precisan explicación”.

O viceportavoz e coordenador do grupo lembrou o papel de “motor” que está a xogar o BNG na elaboración do novo Estatuto e, neste sentido, fixo “unha chamada ás forzas políticas de ámbito estatal para que renuncien a executar estratexicas marcadas desde Madrid e se cinxan ás necesidades do noso país”.

AS PROPOSTAS DOS NACIONALISTAS.- Tamén falou Lobeira da proposta de remodelación do regulamento parlamentar que vai apresentar o BNG, que buscará converter á Cámara nun órgano “áxil e vivo, que dea resposta cumprida aos problemas dos galegos e rematar coas diferencias que existen entre os grupos á hora de apresentar determinadas iniciativas ou de facelo pola vía de urxencia".

Por outro lado, o portavoz parlamentar, Carlos Aymerich, destacou entre outras cuestións, a importancia dos novos orzamentos que se apresentarán a finais deste ano e que, nesta ocasión “teñen que reflectir claramente o alento transformador da realidade que ten o novo goberno”.

O deputado comentou algunhas das normas que están en proceso de elaboración por parte do goberno e que deberían apresentarse no Parlamento neste período, como a Lei do Libro, a de horarios comerciais, a da Minaría, a do Banco de Terras ou a de prevención dos incendios forestais.

AYMERICH RESPOSTA ÁS CRÍTICAS DOS POPULARES.- Aymerich falou das críticas de varios alcaldes do Partido Popular ás declaracións de Quintana o sábado pasado e dixo que “se se deron por aludidos, eles saberán por que”, ao tempo que salientou que “non se pode xogar á irresponsabilidade”, en alusión ao papel que está a xogar a Fegamp e o seu presidente na polémica sobre os incendios.O portavoz dos nacionalistas explicou que “o señor Xosé Crespo asinou un convenio con Medio Rural para a creación das brigadas contraincendios e logo xustifica a actitude dos 30 alcaldes do PP que se negaron a crealas”.

“Para o BNG, estas brigadas deben ser un adecuado servizo de extinción de lumes e non de recadación de votos”, acrecentou Aymerich, ao tempo que reflexionou sobre "o nulo papel da Deputación de Pontevedra e os servizos contraincendios que dependen deste organismo provincial na crise de principios de agosto".