Barreiro alerta de que os pais deixaron de lles falar galego aos fillos

M.G./XORNAL I A Coruña.- A trasmisión xeneracional do idioma galego está en perigo. O presidente da Real Academia Galega coida que os pais (e moi fundamentalmente as nais) deixaron de lles falar galego aos fillos. Isto sucede mesmo no rural, onde o idioma resistiu durante séculos. "Na miña opinión -explica Xosé Ramón Barreiro na revista Grial- trátase do feito máis grave que se está a producir respecto do futuro do idioma, sobre o que deberíamos actuar moi decididamente".

O presidente da Real Academia Galega chega a falar da necesidade dun gran pacto social polo idioma -"un pacto afectivo, non imposto"-, "que nos implique a todos, alén das declaracións retóricas e das boas intencións".

Analizados e vinculados datos económicos con datos lingüísticos, a Mesa pola Normalización Lingüística considera que Cataluña e Euskadi "lograron afortalarse nestes anos, facendo progresar as súas economías e as súas linguas propias. Galiza, no mesmo período, agrandou a súa distancia económica con Cataluña e Euskadi, ao mesmo tempo que sufriu perdas históricas para a súa lingua propia".