Vicepresidencia convoca bolsas para cursar idiomas no estranxeiro

XORNAL I A Coruña.- O obxectivo é facilitar a participación en cursos de idiomas no estranxeiro a todas aquelas persoas que non poidan optar ás axudas que concede a Consellería de Educación e Ordenación Universitaria por non estar matriculados en ningún centro universitario. Os destinatarios son mozos e mozas de 18 a 30 anos que tiveran fixada a súa residencia en Galiza, non matriculados en ningún centro universitario no curso académico 2006-2007, dispostos a realizar un curso de idiomas entre o 1 de xuño e o 31 de outubro dun mínimo de tres semanas de duración en calquera dos estados membros da Unión Europea.

A contía das axudas irá dos 750 aos 1.500 euros, e para a súa concesión priorizarase a maior duración do curso en horas lectivas, o nivel de ingresos da unidade de convivencia, ser membro de familia numerosa ou a pertenza a unha asociación xuvenil.

As solicitudes para estas axudas poderanse presentar, segundo o modelo oficial, no rexistro da Vicepresidencia, ou ben por calquera dos medios previstos no artigo 38.4 da Lei 30/1992.

Con este tipo de medidas, a Vicepresidencia da Igualdade e do Benestar avoga pola redución de obstáculos lingüísticos para acadar unha autonomía persoal máxima da nosa xuventude e promove o concepto de cidadanía europea.