Atento comprométese ante Traballo a que o centro da Coruña non se pechará

XORNAL I A Coruña.- Tras destacar que a Consellería de Traballo pedira á empresa “unha manifestación explícita neste sentido”, Pilar Cancela subliñou que no devandito centro desenvolven a súa prestación laboral mil persoas, que traballan nun campo laboral que corresponde a “unha actividade fluctuante” debido “á propia natureza do servizo”. Así pois, “as variacións de contratas soen ser cotiás”, aclarou Cancela, “e por o convenio prevé esta posibilidade”.

Non obstante, a directora xeral e Relacións Laborais anunciou que a Consellería de Traballo estará en contacto co comité de empresa e coa representación dos traballadores, “e a ver se esta semana” é posible abrir “unha vía de negociación que nos leve a poder acadar un acordo en algún sentido”.

De feito, Pilar Cancela manifestou a súa intención de reunirse esta mesma mañá coa representación dos traballadores, con motivo da manifestación programada para hoxe ante os edificios administrativos da Xunta de Galicia. Cancela manifestou a súa vontade de “aproveitar a oportunidade” para comunicarlles o abordado coa responsable de Recursos Humanos de Atento e “empezar a negociar, e empezar a falar, para ver que oportunidades hai”.

A responsable de Relacións Laborais da Xunta indicou que na reunión con Encarnación Mon estiveron a barallar “unha variada gama de posibilidades” para chegar a unha solución do conflito. Cancela lembrou que se trata dunha empresa de ámbito estatal, con situación de reduccións de cadros de persoal noutros centros. “É un dimensionamento que excede a Galicia. Por suposto, a nós, como Goberno galego, o que nos importan son os 179 traballadores de Galicia, pero tamén entendemos que isto haxa que encaixalo dentro desa actuación estatal”, valorou.

Pilar Cancela lanzou unha mensaxe á representación dos traballadores para intentar acadar “un clima de normalidade” e evitar todo acto violento “que nos leve a crispar moito máis a situación do que está”. A directora destacou que feitos como o lanzamento dun cóctel molotov contra a sede da empresa na Coruña rexistrado o pasado día 12 “non axudan a resolver esta cuestión dun xeito pacífico, que é como ten que resolverse e como se vai resolver ao final”.

Finalmente, Pilar Cancela reiterou que o problema de Atento é “prioritario” para a Consellería de Traballo, que terá “toda a implicación”. Polo tanto, augurou unha semana “moi intensa”, coa finalidade de ter “encauzado o conflito” a semana que vén. “Depende moito das partes, pero a nosa intención é presionar, negociar e intentar buscar unha solución o máis axiña posible”, anunciou.