Feijóo defende que os pais podan elexir a lingua de educación dos seus fillos

XORNAL I Santiago.- O presidente do PP de Galicia defendeu esta mañá o dereito dos pais a elixir a lingua na que son educados os seus fillos e o destes a poder expresarse cos seus profesores en castelán ou en galego, segundo consideren. “Nós estamos a favor do bilingüismo armónico que ha de imperar nunha sociedade que conta coa tremenda sorte de contar con dúas linguas propias. Debemos de ver na convivencia entre galego e castelán unha oportunidade e nunca unha ameaza”, asegurou Alberto Núñez Feijóo. “Un estudante debe poder elixir o idioma no que fai un exame ou no que fai unha pregunta a un profesor dentro dun aula: de aí non nos moveremos un ápice”, apostilou.

O líder dos populares galegos recordou que o seu partido segue estando disposto a buscar o consenso con PSDEG e BNG de cara a apoiar o decreto para o uso do galego no ensino, a condición de que este recolla as consideracións efectuadas polo Consello Consultivo. “Sempre estivemos abertos a negociar; estivémolo hai cinco meses e estámolo agora. Só queremos que a Xunta corrixa os puntos que o ditame deste órgano independente aconsella: o Consello ve aspectos que poden ser susceptibles de ser declarados inconstitucionais e nese camiño non podemos ir da man do Goberno”, engadiu.

Núñez Feijóo defendeu a plena vixencia do Plan de Normalización Lingüística "aprobado en 2004 polo conxunto das forzas parlamentarias", pero rexeitou a interpretación que deste plan fai a Consellería de Educación.

O presidente do PPdeG comparou o marco educativo que resultaría da aplicación deste decreto cos tempos nos que só se podía falar unha lingua en Galicia. “Hai anos non se podía falar galego na Comunidade; agora apostamos porque iso non pase nunca máis nin cunha lingua nin con outra: queremos que todo o mundo exprésese no idioma que queira”, engadiu. Feijóo recordou á Xunta que Galicia "ten demasiados problemas como para que queiran crear outros" referidos á lingua.

Alberto Núñez Feijóo asegura que o Consello Consulltivo cre que o texto "vulnera o equilibrio entre galego e castelán", e sendo así "o PP non será cómplice de PSdeG e BNG na aprobación dun decreto que desatende unha valoración tan grave como esta proveniente dunha fonte tan relevante". O presidente do PP de Galicia insistiu en que o tema da lingua "non caben imposicións ideolóxicas" e mostrouse esperanzado de cara a que a Consellería de Educación "rectifique e incorpore ao decreto as consideracións do máis relevante órgano consultivo de Galicia".