Atopan pezas da Idade do Ferro nunhas escavacións arqueolóxicas en Lalín

XORNAL I Santiago.- O Castriño de Bendoiro en Lalín proporcionou novos achados nos traballos que se realizan no ámbito do trazado da liña do AVE de Ourense a Santiago. Os arqueólogos exhumaron dúas estruturas singulares no contorno do castro ás que se lles atribúe unha función funeraria e se lles sitúa na Idade do Ferro; nestes probables enterramentos, un deles formado por dúas gabias lineais, atopáronse diversas pezas metálicas.

Á espera de estudos máis demorados e detallados, os expertos vincúlanas ó xacemento castrexo de Bendoiro e sitúanas na primeira Idade de Ferro.

Tamén se localizou outra posible tumba de inhumación, asociada a estruturas lineais, pero na que non se atoparon nin restos óseos nin elementos arqueolóxicos asociados. Aínda está por completarse a escavación desta área que permita realizar unha atribución cultural e cronolóxica máis precisa dos restos atopados.

Á espera de que se realicen máis traballos e análises concretas para deixar documentados exhaustivamente estes restos, os arqueólogos cren que este achado podería marcar un fito historiográfico na arqueoloxía galega se se comproba, por primeira vez, que corresponden a tumbas da Idade do Ferro ou mesmo á etapa anterior.