Educación convoca 2.500 bolsas para a inmersión lingüística de alumnos de ESO

XORNAL I Santiago.- A conselleira de Educación e Ordenación Universitaria, Laura Sánchez Piñón, presentou esta mañá en rolda de prensa un conxunto de accións enmarcadas no Plan de Linguas 2007/08. Así, a máxima responsable da Administración educativa autonómica destacou que o seu departamento convoca este ano un total de 2.800 prazas para que o alumnado de 6º de primaria, Educación Secundaria Obrigatoria (ESO) e bacharelato estuden linguas estranxeiras este verán tanto no estranxeiro como en territorio nacional. Deste total, 2.500 prazas son para que outros tantos alumnos de 2º, 3º e 4º de ESO e 1º e 2º de bacharelato podan realizar actividades de aprendizaxe de idiomas no estranxeiro, o que supón 1.000 prazas máis que o ano pasado e un incremento do 66,6%. A orde de convocatoria publicouse o pasado xoves, 17 de xaneiro; e o prazo de presentación de solicitudes será de un mes contado a partir do venres, 18 de xaneiro.

Laura Sánchez Piñón destacou que a Consellería inviste nestas bolsas un total de 4.935.000 euros. Do total de prazas convocadas, tal e como sinalou a conselleira de Educación, 300 prazas de inglés serán para alumnos de 6º de primaria (100 prazas) e 1º de ESO (200 prazas) e terán lugar, no primeiro caso, na Comunidade galega, e, no segundo, en distintos puntos da xeografía española. A duración das estancias será de dúas semanas nos dous casos. A conselleira indicou que haberá 2.000 prazas para alumnado dos demais cursos de ESO (2º, 3º e 4º de ESO), das cales 1.700 serán de fala inglesa e 300 de fala francesa, realizándose as estancias en Reino Unido, Irlanda e Francia cunha duración de 3 semanas. Por último, 500 alumnos e alumnas de bacharelato viaxarán a Canadá durante 3 semanas, sendo 400 prazas para estudar inglés e 100 en francés.

Como novidades, a máxima responsable da Administración educativa galega destacou que o alumnado de bacharelato viaxará a Canadá e a súa viaxe será organizada pola Consellería. Ademais, Sánchez Piñón salientou que este ano, por primeira vez, o alumnado de 6º de primaria e 1º de ESO poderán optar, a título individual, a axudas para estudar linguas estranxeiras durante o verán.

Así, poderá solicitar a axuda o alumnado que curse 6º de primaria, ESO ou bacharelato en calquera dos centros galegos sostidos con fondos públicos. Ademais, son outros requisitos ter, no curso 2006/07, unha avaliación positiva na área de lingua estranxeira que se vai perfeccionar na estadía e non ter solicitada, nin concedida, neste curso 2007/08, outra axuda coa mesma finalidade. A conselleira de Educación destacou que o seu departamento financiará os gastos da viaxe desde o aeroporto ou punto de saída dos distintos grupos; os monitores ou monitoras que acompañarán ao alumnado en cada un dos grupos durante a actividade, desde o momento de saída ao de regreso; os gastos de docencia, cun programa semanal de clases de entre 15-20 horas, incluíndo libros e material escolar, en ambientes multinacionais; as actividades culturais, deportivas e complementarias dos cursos; os gastos de mantenza e aloxamento; e o seguro de accidentes e de responsabilidade civil.