En marcha un novo ciclo de Cinemas Dixitais de documentais galegos

XORNAL I Santiago.- A Axencia Audiovisual Galega, da Consellaría de Cultura e Deporte, inicia un novo ciclo dentro do proxecto Cinemas Dixitais. Desta volta distribuiranse 18 documentais galegos que se poderán ver en numerosos municipios espallados por Galiza. Agárdase repetir o importante éxito obtido co primeiro programa, no que unhas 25.000 persoas asistiron ás proxeccións que se realizaron preto de 120 concellos.

Os obxectivos que a Consellaría de Cultura quere cubrir con Cinemas Dixitais son achegar o cine ás vilas que non contan con salas comerciais, promover as producións audiovisuais galegas e contribuír a estabilizar unha programación audiovisual nos concellos de Galiza. Cumpridos os obxectivos co primeiro ciclo composto por telefilmes, a Consellaría quere agora extender ese éxito aos documentais galegos.

Os filmes que proxectarán nesta ocasión as pantallas dos concellos xiran arredor de catro temas de plena actualidade na nosa sociedade: a vivenda e o urbanismo, a memoria histórica, a emigración e os movementos sociais. O propósito é amosar a capacidade do audiovisual galego de producir documentais que reflexionen sobre a nosa realidade. Con este fin, a Axencia Audiovisual anima aos concellos participantes a fomentar o debate completando as proxeccións con conferencias, charlas, presentacións ou conversas.

A primeira das proxeccións desta nova etapa terá lugar hoxe na Coruña, co pase no Fórum Metropolitano ás 20:30 horas do documental 'Os satélites', dirixido por Paco Lodeiro. A esta seguirán outras exhibicións ao longo dos vindeiros catro meses en todos os municipios de Galiza que queiran adherirse ao programa. A escolma dos filmes inclúe obras de procedencias diversas, que toman moi ben o pulso do estado do documental galego actual: producións televisivas, producións independentes, longametraxes subvencionados ou curtametraxes de creadores individuais.

Os filmes que se inclúen son 'Un metro cadrado' (dirixido por Beatriz Vázquez Campaña), 'A casa de Lola de Andrés' (Elena Carnoto), 'A cidade perdida' (Miguel Anxo Romero), 'Bandoleiros ou guerrilleiros' (Alfredo García Pinal), 'Lobos sucios'(Felipe Rodríguez Lameiro), 'Traballadores do contrabando' (Víctor Aparicio), 'A memoria nos tempos do volfram' (Antonio Caeiro), 'Memorial de Camposancos' (José Ballesta), 'Os Satélites' (Paco Lodeiro), 'Isaac' (Xosé Abad), 'Vilaboa, mirando á Meca' (Álvaro Gago), 'Mundo bazar' (Sabela Pernas), 'Cabo Verde, Sabi' (Manuel Masada), 'Bs. As.' (Alberte Pagán), 'As Encrobas' (Xosé Bocixa), 'Historia dunha parroquia' (Marcos Nine), '2050. How soon is now?' (Ruth Chao) e 'Fronteiras' (Rubén Pardiñas).

Éxito do primeiro ciclo

A programación dedicada aos documentais tomará o relevo do primeiro ciclo de Cinemas Dixitais, que se dedicou aos telefilmes galegos. Desde que se puxo en marcha en outubro do ano pasado, conseguiu chegar en catro meses a máis dun cento de concellos, acadando os 25.000 espectadores.

A Consellaría de Cultura considera moi satisfactoria a cantidade de público que congregou este ciclo desenvolvido desde a Axencia Audiovisual Galega. A cifra sobrepasou as expectativas iniciais, e toma especial relevancia ao observar que a maioría dos municipios que participaron nesta rede alternativa de distribución audiovisual está formada por pequenos concellos do rural, aos que resulta máis difícil que cheguen de forma habitual as producións galegas.

Cinemas Dixitais é a primeira experiencia deste tipo que se desenvolve en toda a Península. Este circuíto pretende pór en contacto coa cidadanía aquelas producións que teñen en moitos casos un difícil acceso ao ámbito comercial.