Callón di que “detrás dos que queren que o galego desapareza” está o PP

XORNAL.COM I Santiago.- A Mesa pola Normalización Lingüística presentou esta mañá os soportes gráficos para a campaña “Polo dereito a vivirmos en galego”, coa que se quere animar toda a cidadanía a participar na manifestación nacional que se celebrará, con este mesmo lema, o vindeiro 18 de maio. En total, na campaña previa vanse repartir 20.000 cartaces, 10.000 adhesivos, 5.000 adhesivos para automóbiles e 10.000 folletos.

Nunha conferencia de imprensa celebrada en Santiago de Compostela, o presidente da Mesa, Carlos Callón, informou de que setenta organizacións e colectivos xa teñen enviado o seu apoio ao manifesto e que cada día chegan novos apoios, “o cal nos fai agardar unha mobilización cunha grande participación”. Así mesmo, anunciou que se van pór autobuses gratuítos a disposición das persoas que quixeren participar na manifestación, que partirá ás doce do mediodía da Alameda e que concluirá na praza da Quintana.

Callón animou toda a sociedade a participar, e asegurou que “non estamos nun momento calquera para o galego, estamos nunha encrucillada na que, ou ben pode ficar como unha lingua residual sen usos espontáneos, encamiñada á súa desaparición, ou ben podemos conseguir a súa plena recuperación e expansión a todos os ámbitos da sociedade”.

Neste sentido, o presidente da Mesa sinalou que “o galego está no peor momento da súa historia, mais como sociedade temos os instrumentos para recuperalo”. Callón apuntou a que existen “moi fortes presións por parte de grupos que queren que a lingua galega desapareza, detrás das cales se atopa un importante partido político”. Fronte a isto, o dirixente da asociación en defensa da lingua convidou todos os cidadáns e cidadás a que “se decaten de cal é a situación de discriminación que padecen as persoas que queren vivir na lingua propia do país” e que “defendan no seu día a día o dereito a vivir en galego, que non prexudica a ninguén”.

O presidente da Mesa denunciou que “o Partido Popular está alentando un discurso contra o galego, cínico, hipócrita e baseado na mentira”, e recordou que “a maior perda de falantes da historia foi durante os gobernos de Manuel Fraga”.