Quintana augura un “resultado histórico” para os nacionalistas

Marcos J. Román XORNAL.COM I Santiago.- Pouco despois de que o presidente da Xunta, Emilio Pérez Touriño, ratificase de xeito oficial que as eleccións galegas terán lugar o vindeiro 1 de marzo, o vicepresidente galego e líder do BNG, Anxo Quintana, amosouse convencido de que as urnas consolidarán á “formación política ascendente” que el lidera e augurou que terá “un resultado histórico”.

Na actualidade, o Bloque conta con 13 deputados na Cámara galega, lonxe dos 17 que tiña na anterior lexislatura e dos 18 que obtivo nas eleccións de 1997, o seu teito histórico, que sitou aos nacionalistas coma a segunda forza política en Galicia.

Tal e como vén facendo nos últimos días, o portavoz nacional do Bloque Nacionalista Galego quixo chegar máis alá dos votantes tradicionais da súa formación e aproveitou para facer un chamamento a “tódos os galegos que levan a Galicia no corazón”, sexan galeguistas ou nacionalistas, para que realicen un “esforzo entre todos” que permita, tras o 1 de marzo, facer unha comunidade “máis forte e moito máis respectada”. Unha cuestión que, segundo dixo, desexan todos os galegos.

O vicepresidente do Goberno galego compareceu ante os medios de comunicación na sé do seu departamento para valorar a firma do decreto de convocatoria electoral e disolución do Parlamento feita por Touriño, aínda que lonxe de dar unha visión institucional optou por facer una análise dende a óptica do seu partido, do que dixo que de cara aos vindeiros comicios ofrecerá “ideas”, “traballo”, “determinación”, “firmeza”, “diálogo” e “compromiso co país”.

Quintana, que na víspera da chegada dos Reis Magos apareceu vestido de xeito informal, con pantalóns vaqueiros e chaqueta de lá, destacou así mesmo que afrontan a vindeira cita electoral “cunha enorme ilusión”.
Nese sentido, basou a súa confianza no feito de que o BNG é unha “formación política ascendente”, cunha tendencia de apoios á alza que o vicepresidente da Xunta atribuiu á súa “política de transformación” na Xunta e ao “traballo no Goberno para provocar un cambio” en Galicia, coa que teñen demostrado “un compromiso” en todos estes anos.

Sen embargo, Quintana non aproveitou para facer un balance das principais accións impulsadas, como si fixera minutos antes na súa intervención televisada o presidente da Xunta e, de feito, non se referiu en ningún momento ao discurso de Touriño.

Fontes nacionalistas criticaron despois o “ton personalista” do xefe do Executivo galego e lamentaron que non aproveitase a ocasión para facer mención aos grandes retos de futuro para a comunidade, como son a revisión do sistema de financiamento autonómico, a elaboración dun novo Estatuto ou a aprobación por parte das Cortes de propostas unánimes da Cámara galega para transferir Tráfico e reformar o sistema de voto emigrante.

Listos para a campaña

Unha vez oficializada a data dos comicios, o BNG prepara xa a precampaña e a campaña, que coincidirá coa de Euskadi, un feito ao que restaron importancia os dirixentes nacionalistas. O propio Quintana asegurou que, mentres hai xente preocupada por esta coinicidencia, el está “encantado” co feito de que desde Madrid fagan menos caso aos galegos porque oiranse “menos tonterías”.

Nesa liña, o portavoz do BNG na Cámara, Carlos Aymerich, apuntou que na súa formación afectaralles menos que a PP e PSOE porque eles non teñen que repartirse entre Galicia e Euskadi e non dependen da visita de “paracaidistas”, que é como se coñece aos dirixentes dunha formación doutras comunidades ou do Goberno central que acuden en campaña a apoiar ao aspirante local.

Un dos primeiros actos de Quintana como candidato será o vindeiro mércores, cando participe na homenaxe que se lle brinda a Castelao en Rianxo.