A Xunta xa admitira hai dez meses que A Areosa acolleu lixo non permitido

Miguel Pardo / XORNAL.COM I A Coruña.- A Consellería de Medio Ambiente sabía e admitira xa hai dez meses que o vertedoiro da Areosa acollera residuos non autorizados. Un informe do departamento ao que tivo acceso este diario demostra que os terreos propiedade de Danigal –que xuntan a día de hoxe unha montaña de residuos con grave perigo de derrubamento– recibiran no segundo semestre de 2007 máis de 27.196 toneladas de “residuos sólidos urbanos orgánicos”, cando a súa autorización só lle permitía asumir desperdicios inertes.

O vertedoiro da Areosa, en Cerceda, acolle actualmente máis de 5.000 toneladas diarias de residuos de todo tipo procedentes da Coruña e da súa área metropolitana malia posuír autorización exclusiva para desperdicios inertes non perigosos.

A ausencia de impermeabilización para evitar a fuga dos lixiviados e de chemineas para extraer os gases pon en grave risco de derrubamento un vertedoiro que xa fai lembrar a desfeita de Bens, tal e como desvelaran a este diario fontes achegadas ás empresas.

A masiva presenza de gaivotas na zona é a evidencia máis clara da presenza de residuos orgánicos e altamente contaminantes, malia que Danigal insiste en que só acolle “residuos inertes”. De feito, a propia Consellería de Medio Ambiente admitiu o pasado 31 de marzo de 2008 que Sogama vertera nos terreos de Danigal 27.000 toneladas de residudos sólidos urbanos orgánicos no segundo semestre de 2 007.

O documento ao que tivo acceso este xornal é a contestación da Dirección Xeral de Calidade e Avaliación Medioambiental a requirimento do Xulgado de instrucción número 1 da Coruña, nun procedemento aberto contra Danigal.

No devandito documento, a Consellería de Medio Ambiente informa de que “durante o ano 2007 e ata o 26 de xullo de ese 2007, Danigal estaba autorizado” a recibir uns determinados residuos. Na longa lista de lixo autorizado inclúense desperdicios inertes de “madeira, tecidos, vidro, caucho, metais ou pedras”, pero nunca orgánicos.

Logo dunha “prórroga do 26 de xullo de 2007” –na mesma época na que Sogama e A Coruña asinan un acordo para intercambiarse lixo que non poden tratar– os residuos “admisibles” restrínxense unicamente a quince tipos de desperdicios co seu correspondente código LER e nos que tampouco se inclúen residuos urbanos orgánicos.

No entanto, “o 6 de marzo de 2008, a empresa presenta relación de entradas do segundo semestre de 2007”, a etapa na que a planta coruñesa de Nostián comeza a enviar a Sogama os teóricos rexeitamentos que non pode tratar.

Curiosamente, e malia que entre eses rexeitamentos tan só se autorizan desperdicios inertes, a empresa recoñece neste informe que aos terreos da Areosa chegaron procedentes de Sogama, que non foi quen de tratalas, 27.196,71 toneladas de “residuos sólidos urbanos orgánicos” entre as 81.795,36 toneladas totais que inclúen lixo textil, material de illamento, area, papel e cartón, xoguetes, vidro ou plástico.

Así, e xa no primeiro semestre tras o acordo asinado entre Sogama e o Concello da Coruña, a planta da Areosa de Danigal recibía máis de 4.500 toneladas mensuais de residuos orgánicos chegados da cidade herculina e da súa área metropolitana.

Deste xeito, e segundo os cálculos propios e os das fontes consultadas por este diario, A Areosa acumula xa máis de 100.000 toneladas de desperdicios urbanos procedentes de Nostián. Este lixo, unido ás 300.000 toneladas de residuos variados que recibius Danigal, converten este terreo de Cerceda nunha montaña de porcallada cun mínimo de 400.000 toneladas.

O documento, moi clarificador, advirte como Danigal informara xa á consellería da presenza de residuos orgánicos na Areosa, malia que ningunha das dúas partes o recoñece a día de hoxe. Aínda así, o departamento que dirixe o socialista Manuel Vázquez prometeu investigar a xestión da compañía e xa a ameazou con “multas, peche ou denuncia á Fiscalía” se comprobaba uns vertidos que hai tempo que parecía saber.

MÁIS NOVAS SOBRE O CASO AREOSA
A administración xa admitira hai dez meses que A Areosa acolleu lixo non permitido
Silencio do presidente, o conselleiro e o concello sobre os vertidos da Areosa
O Concello de Cerceda di estar “preocupado” con Danigal
O caso Areosa desata a tensión política