Touriño rexeita entrar na “lameira” do PPdeG sobre os gastos da Xunta

D.L./M.S./M.J.R. / XORNAL.COM I Santiago.- “Non lle vou facer a campaña ao PP”. Con estas palabras o presidente da Xunta, Emilio Pérez Touriño, quixo dar onte por finalizada a controversia xerada en torno aos 4 millóns de euros da reforma de tres salas de reunións do complexo de San Caetano. Considera que esta polémica só interesa ao PP de cara a converter a campaña electoral “nun barrizal”, algo que “non van conseguir”, afirmou.

As críticas polo coste das reformas no edificio da Xunta é só un dos últimos capítulos da loita electoral destes días, que vai en aumento conforme se achega a data electoral. Nesta tola carreira cara as urnas, todo punto gañado ao inimigo é importante. Así que o grupo da oposición tampouco está disposto a ceder no se refiere ao debate entre os candidatos que se celebrará na TVG, previsto para o día 20.

Sobre este cuestión, o presidente do PPdeG e candidato á Presidencia da Xunta, Alberto Núñez Feijoo, xogou onte a ambigüidade. Expresou a súa disposición a acudir á cita a tres prevista pola televisión pública autonómica, na que tamén estarán Emilio Pérez Touriño (PSdeG) e Anxo Quintana (BNG). Pero tamén insistiu en que é necesario celebrar debates a dous, porque “nós aceptamos a súa proposta e agora esperamos que eles acepten a nosa”.

Mentres Feijoo facía estas declaracións, Touriño estaba noutro campo distinto: na celebración do Consello da Xunta nunha das salas de San Caetano cuia reforma é motivo de polémica.

O presidente galego amosouse visiblemente molesto coas preguntas dalgúns dos xornalistas asistentes á rolda de prensa posterior a esta reunión. O xefe do Executivo asegurou non querer “entrar” nun debate que, afirma, é “claramente unha estratexia política” do Partido Popular, que agora trata de cuestionar unhas obras que, en ningún caso, afirma, son “un escándalo”.

Segundo a explicación de Pérez Touriño esas obras, postas en marcha no ano 2007, axústanse ao “procedemento ordinario de contratación previsto na Lei de Contratos do Estado”, o mesmo, apunta, que empregou o Executivo de Manuel Fraga para dar luz verde á construción da residencia oficial de Monte Pío. Con todo, o xefe do Executivo advirte unha diferenza: a actitude da oposición –naquela altura, PSOE e BNG–, foi “diferente” e o montante investido foi superior aos 30 millóns de euros, algo que, di, socialistas e nacionalistas xulgaron “razoable”.

A tensión entre o presidente e a bancada da prensa foi evidente ata que a quenda de preguntas abandonou a cuestión das devanditas obras, unha polémica que, en opinión de Touriño, só interesa ao PP de cara a converter a campaña electoral “nunha lameira”, algo que “non van conseguir”. Con todo, Touriño mostrouse especialmente contrariado no momento en que o custo das obras foi relacionado coa crise económica, aínda que sexa “certo” que a adxudicación non infrinxe a legalidade. “Si es cierto, –retou Touriño–, dígalo”.

Gastos suntuarios

Quen o dixo, horas máis tarde, foi o presidente do PP; Mariano Rajoy, nun acto de precampaña ao que acudió na localidade do Barbanza. En declaracións aos xornalistas acusou a Touriño de ter “gastos suntuarios”, polos que cre que debe “pedir perdón” aos galegos.

Rajoy dixo que é “unha vergoña” que Galicia “sexa noticia” por “dilapidar” os cartos, xa que meteu nun mesmo saco varios exemplos de xestión do Goberno bipartito “ben pouco edificantes”.

O líder do PP lamentou que a Xunta non dea exemplo no actual contexto de crise económica, e que a austeridade non sexa “a súa sinal de identidade”. Deste xeito referiuse a remodelación das tres salas no edificio administrativo de San Caetano, e as cadeiras de deseño que inclúen, por máis de 2.000 euros cada una .

Tamén insistiu en que o coche oficial do titular do Goberno galego é “máis caro que o de Obama”, o presidente dos Estados Unidos.

Pola súa banda, o presidente do PP galego, Alberto Núñez Feijoo, tampouco podía deixar de aludir ao “despilfarro” na Xunta, que denunciou o seu partido. Salientou a compra do coche oficial de 480.000 euros e garantiu que, se el chega ao Goberno galego, os dirixentes moveránse en Citroën, fabricados enVigo, en vez dos Audis do actual Goberno e o anterior de Manuel Fraga.