Máis de 3.000 persoas reclaman en Santiago o dereito a unha “terra viva”

Redacción / Axencias / XORNAL.COM I Santiago.- Entre 5.000 e 3.500 persoas, según estimacións da Policía Local de Santiago, acudiron onte á manifestación convocada pola plataforma Galiza non se vende, para protestar nas rúas da capital galega contra as políticas sociais e ambientais da Xunta e reclamar o “dereito a unha terra viva e a unha vida digna”. Á convocatoria acudiron desde asociacións en defensa do medio ambiente ata colectivos independentistas ou agrupacións localis que se opoñen a moitas das infraestruturas proxectadas polo Goberno galego.

A marcha, que saíu pasadas as 12.30 horas da Alameda compostelana, percorreu varias rúas da parte nova e da zona vella ata rematar na Praza da Quintana. Alí, varios representantes de diversos colectivos leron un manifesto no que denunciaron as políticas “xordas e mudas” emprendidas polos mandatarios galegos ante a “crise económica, ambiental i enerxética”, e manifestaron a súa “máis enérxica protesta” ante o panorama que deixa tras de si o bipartito PSdeG-BNG despois de tres anos e medio á fronte da Xunta.

No escrito conxunto, os manifestantes recriminaron que baixo unha apariencia “supostamente progresista”, as políticas sociais e ambientais supoñen unha “continuación” das implantadas polos gobernos anteriores. “Empregan o gasto público para alimentar un modelo económico e social obsoleto e inxusto”, afirmou un dos representantes durante a lectura do manifesto.


“Marbellización” da costa

Durante a lectura do texto foi criticada a “marbellización” da costa galega e o plantexamento urbanístico, así como a “falta de verdadeiras políticas sociais” por parte dos responsables políticos. Ademais, os lectores do manifesto censuraron o “esquecemento interesado dos máis necesitados” na coxuntura actual.

En concreto, foron obxecto de crítica o Plan Acuícola, que “devasta zonas de costa en beneficio das multinacionais”; os proxectos de construcción de portos deportivos; o plan de minería, que para os manifestantes constitúe “un triste modelo de expoliación do territorio”; e o decreto eólico, xa que na súa opinión “non ten en conta áreas de alto valor” ecolóxico e patrimonial, e “regala” os montes galegos ás empresas eléctricas. Segundo o texto, todas esas iniciativas están “camufladas baixo a cantinela da creación de postos de traballo”, e non teñen en conta todo o que se destrúe “en actividades como a pesca, o marisqueo artesanal ou a agricultura”.

Os manifestantes tamén denunciaron a través do seu escrito a contaminación dos ríos e a implantación de “industrias nocivas e perigosas como Reganosa, Sogama ou Ence-Elnosa”. Ademais, rexeitaron o traslado da planta de celulosa ás Pontes. No tocante ao transporte, recrimináronlle ao bipartito o “abandono do transporte público” a favor da liña ferroviaria de alta velocidade. “Quen lles pediu o AVE? Imos traballar a Madrid todos os días?”, preguntaron.

A lectura do manifesto rematou aludindo á carta que o xefe indio Noah Sealth remitiu en 1855 ao home branco, considerada unha das máis fermosas proclamas ecoloxistas. “A terra non nos pertence, nós pertencemos á terra”.