O Sigre defende a súa actuación en Cerceda mediante unha carta ás farmacias

M. Pardo / XORNAL.COM I A Coruña.- O Sigre distribué desde a semana pasada entre os colexios farmacéuticos e as farmacias de toda España unha circular na que defende a súa xestión no caos de Cerceda, onde se acumularon durante seis anos máis de 10.000 toneladas de desperdicios medicinais que non foron incinerados, tal e como cría e acordara o sistema estatal.

O Sigre, tal e como confirmaron os colexios provinciais galegos, enviou unha circular na que informa das medidas que está a tomar ante a suposta fraude e asegura que toda a documentación que lle foi achegada por Danigal, xestor da planta que ten en Cerceda, “acredita que estes residuos foron valorizados enerxeticamente” en Sogama, algo que nega a sociedade pública xa que non tiña a capacidade técnica para facelo.

A circular enviada ás farmacias aclara que o Sigre mantén unha investigación “con carácter de urxencia” para tomar as “medidas legais” que correspondan contra Danigal, a única empresa coa que o sistema de xestión de envases farmacéuticos mantiña unha relación contractual.

O Sigre asegura que paralizou a entrega dos restos de medicamentos a Sogama, que aclara que terá listo en breve a planta que necesita para realizar a valorización enerxética. No entanto, puidera ser que a sociedade pública non volvera acoller este lixo, xa que o sistema estatal busca outro centro para a valorización e incluso outra ubicación para a nave de tratamento que xestiona Danigal en Cerceda e que conta con vinte traballadores.