Negreira (PPdeG) cre que Rajoy saíu "reforzado" e di que foi o seu "mellor militante"

O presidente provincial do PP da Coruña, Carlos Negreira, asegurou hoxe que as eleccións galegas reforzaron ao seu partido e ao seu presidente nacional, Mariano Rajoy, do que, dixo, foi o seu "mellor militante", e destacou tamén os resultados "contundentes" do seu partido nos partidos xudiciais da Coruña e Betanzos, e sobre todo, na cidade herculina.

En rolda de prensa, afirmou que o resultado das eleccións galegas foi unha "mensaxe rotunda" en España e unha vitoria "fronte aos nacionalismos e os gobernos perdedores". Por iso, considerou que marcarán "a pauta" no resto de España.

Negreira cualificou tamén a Rajoy como "o mellor militante" que tivo o PPdeG nestas eleccións "porque estivo en todos os sitios e ao que se lle dixo" e se mostrou convencido de que empeza "a marcha atrás" de José Luis Rodríguez Zapatero á fronte do Executivo central.

DIMISION DE TOURIÑO

Respecto á dimisión do xa ex secretario xeral dos socialistas galegos, Emilio Pérez Touriño, Negreira reiterou que "respecta" as decisións que se adopten en cada partido e lle agradeceu estes catro anos de goberno "con independencia de que o que me poida parecer como o fixo", engadiu.

Tamén evitou pronunciarse sobre a posible marcha do presidente da Deputación de Ourense, José Luis Baltar, que "saberá o que ten que facer". Non obstante, sostivo que será unha decisión que "terá que meditala coa súa xente e co presidente", indicou en referencia ao PP de Ourense e a Núñez Feijóo.

RESULTADOS NA BISBARRA

Negreira, que analizou hoxe con alcaldes e voceiros dos partidos xudiciais da Coruña e Betanzos a vitoria do PPdeG, afirmou que os resultados electorais puxeron de manifesto "que o modelo do bipartito importado de Santiago non convenceu en Galicia".

Así, destacou o feito de que o PPdeG fose a forza máis votada en 86 dos 94 municipios da provincia, cunha perda de votos do 3,5 e o 4,2 por cento por parte de PSdeG e BNG, respectivamente. No partido xudicial da Coruña, o PPdeG subiu sete puntos, os mesmos que caeu o BNG, mentres que o PSdeG o fixo en cinco puntos, o que supuxo que os populares saquen 10 puntos de vantaxe aos socialistas e 30 aos nacionalistas en porcentaxe de votos.

No partido xudicial de Betanzos, a suba do PPdeG foi de case tres puntos, os mesmos que caeu o PSdeG, mentres que o BNG o fixo en dous, de forma que a populares e socialistas os separan 27 puntos en porcentaxe de votos.

FORZA MAIS VOTADA NA CORUÑA

Non obstante, Negreira subliñou, sobre todo, a vitoria na cidade da Coruña, onde foron a forza máis votada co respaldo en 221 mesas electorais, fronte a 80 nas que gañou o PSdeG. O tamén voceiro do PP no Concello da Coruña sinalou que isto supón que estean "a pouco máis de 3.000 votos para alcanzar a maioría absoluta na cidade" e destacou o apoio recibido en distritos tradicionalmente socialistas como Agra del Orzán ou Monte Alto.

Ao respecto, insistiu en que A Coruña necesita un "cambio" para recuperar o "seu liderado" político, aínda que evitou confirmar se se presentará á Alcaldía da Coruña, e acusou o rexedor coruñés, Javier Losada, de optar por "un camiño partidista" e non por "escoitar á cidade" cando formou goberno co BNG.

O presidente provincial do PP da Coruña reiterou, por outra parte, que as prioridades do novo Executivo autonómico será a creación de emprego e cualificou como "desesperanzadores" os datos do paro do mes de febreiro. Tamén sinalou que a súa intención é "recuperar o tempo perdido" nas infraestruturas.