O BNG replica a Beiras que “opine” no seo da Executiva

O posicionamento público do ex portavoz nacional do BNG, Xosé Manuel Beiras, sobre as causas da derrota electoral do pasado domingo e a petición de demisións da Executiva na que o antigo líder da formación exerce, desde a pasada Asemblea Nacional, a responsabilidade de Alternativas Programáticas en representación do colectivo Encontro Irmandiño causaron un sensible malestar no seo da dirección do Bloque.

Se ben dende a propia Executiva se opta pola prudencia e, deste xeito, non existe un posicionamento sobre “o contido” dunhas declaracións nas que Beiras insta a todos os membros do órgano de dirección a “pór os seus cargos a disposición”, o secretario de Organización do BNG, Alberte Ansede, mostrou onte, en declaracións a Xornal de Galicia, a súa incomodidade por mor de que estas consideracións cheguen mediante unha declaración aos medios e non a través do debate interno.

En opinión de Ansede, “foi unha mágoa” que o líder histórico da formación “non trasladase as súas opinións na reunión da Executiva do luns”, á que Beiras non asistiu e, pola contra, di, “si o fixese pasados dous días e nos medios”. Segundo o político nacionalista, ao optar pola discrepancia ante os medios no canto de participar nas convocatorias dos órganos internos, “priva de valorar as súas propostas” aos membros da dirección nacionalista.

Fronte ao que o responsable de organización do BNG limita a unha “posición persoal do señor Beiras”, Alberte Ansede explica que a dirección do Bloque “seguirá o camiño trazado” no marco da “nova situación” creada logo dos resultados dos comicios, unha folla de ruta que, en todo caso, afirma, pasa pola “toma de decisións colectivas” que virán determinadas “polos órganos e polas asembleas”.

“Decisións colectivas”

O resultado das urnas e a decisións a tomar logo da perda das responsabilidades de Goberno será, segundo explica o secretario de Organización do BNG, “analizada e debatida por toda a militancia” e “para iso”, explica, “xa está convocado un Consello Nacional”. “A partir de aí”, apunta Ansede, “celebraranse consellos e asembleas comarcais e tamén unha Asemblea Nacional”.

En calquera caso, Ansede fai especial fincapé no feito de que “no BNG as decisións son colectivas e as responsabilidades tamén o son”. Deste xeito, e ante as peticións de responsabilidades e dimisións expresadas por colectivos críticos como Esquerda Nacionalista, Movemento pola Base ou o propio Encontro Irmandiño de Xosé Manuel Beiras, Ansede subliña que “todos estamos sometidos en todo momento ás decisións da militancia”.

O proceso de debate interno, di, servirá tamén para definir posturas no “plano social” no que, di, o BNG se está “preparando” para “non deixar sen contestación calquera ataque do Partido Popular ás conquistas destes catro anos”, como “as galescolas”, o “concurso eólico” ou “o decreto de uso da lingua galega”.