Feijóo provoca o primeiro paso atrás da democracia na defensa do galego

O presidente do PP galego e próximo presidente da Xunta, Alberto Núñez Feijóo, seguiu desglosando onte iniciativas postas en marcha polo bipartito que el erradicará en canto chegue ao Goberno galego e, nesa liña, avanzou que coa súa formación Galicia vai “volver ás escolas infantís”, fronte ás chamadas ‘galescolas’ impulsadas pola parte nacionalista do Executivo.

“Ímoslles chamar ás cousas polo seu nome”, indicou Feijóo, para quen o termo escolas infantís “é a denominación correcta” para referirse aos espazos de educación para nenos de cero a tres anos e ademais “non produce ningunha aresta nin problema”. Máis alá de cuestións semánticas, explicou que o obxectivo é que se ofreza a ensinanza “de acordo coa decisión dos pais”, é dicir, “se os pais queren que o primeiro idioma para ler e escribir sexa o galego se respectará, e se pola contra prefiren que os seus fillos aprendan en castelán, se respectará”.

Deste xeito, o PP daralle a volta á política lingüística seguida nas galescolas, contra as que os populares se manifestaron durante toda a lexislatura, do mesmo xeito que contra o chamado decreto do galego na ensinanza, que Feijóo tamén se comprometeu a derrogar como primeira medida de goberno.

Pouco e pouco o vindeiro xefe do Executivo autonómico vai anunciando todas aquelas cousas que pretende cambiar das postas en marcha polo bipartito, algunhas delas xa avanzadas na campaña, o que lle dá pé a dicir que as reformas contan co respaldo dos galegos nas urnas. Así, tamén onte deixou claro que non quere seguir co modelo establecido no Consorcio de Servizos Sociais, por ser “pouco eficiente e moi caro”. O líder popular non concretou a alternativa que propón, xa que prefire facer antes un “análise” da utilización dos servizos públicos para despois repensalos, “sen poder prexulgar cal vai ser a fórmula administrativa que imos acometer”.

En todo caso, avanzou que contará moito cos concellos e que a maior parte dos cartos empregados no sistema irán parar aos maiores e moito menos á Administración, xa que na actualidade, segundo el, “se gasta máis en burocracia que en prestación de servizos aos maiores”. Núñez Feijóo non pechou a porta á privatización do sistema, minutos despois de que o seu presidente provincial na Coruña e deputado, Carlos Negreira, a abrise por completo ao indicar que “hay que resolver el problema ahora y darle una salida” á situación dos servizos sociais que segundo dixo pasa por “aprovechar y concertar con residencias privadas” para que no haya mayores a la espera de una plaza.

“Por ideologizar la gestión se ha mantenido el problema”, interpretou Negreira, quen por outra banda considerou que no sector acuícola non se avanzou nada nestes catro anos e que avogou por permitir a instalación dunha macropiscifactoría en Cabo Touriñán. “A Rede Natura non prohíbe todo, senón determinados usos”, explicou o presidente provincial dos populares coruñeses.

Construción no litoral

Nese sentido, o líder do seu partido coincidiu en que a instalación dunha planta acuícola nesa zona tiña “toda a normativa ambiental aprobada”, aínda que tamén recoñeceu que quizais agora a empresa –Pescanova– non desexe seguir co proxecto na actual situación de crise económica. “Galicia enteira sabe que queremos potenciar a Costa da Morte”, insistiu Feijóo, que na especie de contrarreforma que propón tamén avanzou que pedirá ao Goberno bipartito que no traspaso de poderes lle facilite o plan do litoral que deixou encargado cando era conselleiro no ano 2005. Será entón, tras analizar o documento, cando decida se renova a prohibición de construír na franxa de 500 metros máis próximos á costa, que finaliza o vindeiro mes de maio.

Finalmente, reiterou unha vez máis a súa intención de “revisar o concurso eólico” e explicou que o fará “coa intensidade” que marque a Asesoría Xurídica da Xunta, á que encargarán un informe ao respecto.

No ámbito estatal, o presidente do PP galego tamén foi consultado polo feito de que a Fiscalía non atopase indicios de delito contra os aforados nacionais no caso Gürtel. “Rematou a campaña electoral, iso é unha boa noticia para todos”, concluíu o líder popular, que deste xeito vinculou a actuación xudicial coa celebración das eleccións autonómicas en Galicia e en Euskadi. En todo caso, dixo confiar no poder xudicial.


Situación do pp en ourense

Por outra banda, Alberto Núñez Feijóo negou onte que ningún compañeiro seu en Ourense lle falara a necesidade de afrontar xa o relevo de José Luis Baltar como presidente do partido na provincia e dixo que ten pendente unha conversa co barón ourensán que “nin se produciu nin ten data”. Nesa mesma tese concordaron fontes próximas ao dirixente ourensán, que explicaron que mantén a súa disposición a facilitar o relevo á fronte da provincia “canto máis pronto, mellor”, “sen traumas” e co apoio dos militantes. En todo caso, apuntaron que non está previsto que o asunto da sucesión se trate na reunión da Xunta Provincial que ten lugar hoxe e á que asisten tanto Feijóo como Baltar.