Feijóo sitúa a “liberdade lingüística” por riba das resolucións europeas

A decisión do Parlamento europeo de rexeitar un informe promovido polo PP para garantir a liberdade dos pais para escoller a lingua da educación dos seus fillos semella que non botará atrás a Alberto Núñez Feijóo no seu compromiso de que sexan os proxenitores os que elixan en Galicia se os nenos son escolarizados en galego ou en castelán, unha promesa que efectuou ao longo da campaña electoral e que reiterou unha vez que gañou as eleccións o pasado 1 de marzo.
“Os dereitos civís están por riba das resolucións de calquer órgano”, interpretou onte o futuro presidente da Xunta, ao ser consultado pola decisión da Eurocámara, que aprobou o pasado martes un texto alternativo ao proposto polos populares, impulsado polos grupos socialista, liberal e verde e que aposta por salvagardar o multinlingüísmo nos países ou rexións nas que coexistan dúas ou máis linguas oficiais.
O documento suprime puntos do informe orixinal, que fora aprobado no pasado mes de febreiro pola Comisión de Cultura do Parlamento Europeo, un feito ao que se referiu Feijóo, que considerou un “erro” do PSOE modificar o dictame de dita comisión e acusou aos socialistas de ter “unha mensaxe nas comunidades monolíngües e outra nas bilíngües”.
O líder popular asegurou que a resolución que procuraba o PP en Bruxelas apostaba por algo “tan elemental como un multilingüísmo cordial” e insistiu en que a súa política lingüística na educación pasa pola promoción e o respeto á lingua propia de Galicia “e o respeto ás liberdades individuais para exercer calquera das dúas linguas oficiais” na comunidade, unha postura que “é a máis sentida polos votantes do PP e do PSOE en Galicia e estou convencido de que tamén por moitos votantes do BNG”. En canto á decisión da UE, veulle a restar importancia porque, segundo el, “os dereitos civís constitucionais son propios de cada persoa e iso é o que ten que prevalecer sempre”.
As críticas á intervención de Feijóo non se fixeron esperar e A Mesa pola Normalización Lingüística cargou con dureza contra o vindeiro xefe do Executivo galego, do que dixo que “lle vai crecer o nariz de tanto mentir”. Para o colectivo, “hai que ser moi cínico” para denominar bilingüísmo cordial ás emendas do PP en Bruselas, “que dicían que só existía o dereito a se escolarizar en castelán”. A agrupación cidadá reclamou a Feijóo “prudencia e sentido institucional” e unha vez máis lamentou a decisión dos populares de derogar o decreto do galego no ensino.

Pactos co PSOE e o BNG

Fóra do asunto da lingua, Feijóo aproveitou a súa comparecencia para asegurar que sexa cal sexa a postura da oposición, o PP adoptará na Cámara galega unha actitude responsable, que reclamou tamén a socialistas e nacionalistas. Nesa liña, amosou o seu desexo de “intentar non defraudar á xente” e tamén o de “intentar chegar a pactos en temas clave para o país” con PSOE e BNG.
Finalmente, o lider do PP tamén foi interpelado ao respecto das palabras do conselleiro de Economía, José Ramón Fernández Antonio, quen defendeu a labor en materia económica do bipartito e pediulle que non a cambiase por completo. “Non lle diría ao conselleiro de Economía do próximo Goberno que se vanaglorie de políticas económicas mentres hai máis de 220.000 parados en Galicia”, replicou Feijóo, que reclamou ao titular de Economía en funcións “máis prudencia e modestia”.