Feijóo ningunea a Educación e resérvase o control sobre Política Lingüística

O presidente da Xunta, Alberto Núñez Feijóo, confirmou onte o nomeamento do filólogo e sociolingüísta vigués Anxo Lorenzo como secretario xeral de Política Lingüística. Nunha intervención tras o Consello da Xunta marcada fundamentalmente polo debate lingüístico -case 20 dos 40 minutos de duración-, Feijóo insistiu en salientar a independencia de Lorenzo, mesmo cando se lle inquiriu pola posible proximidade no pasado do novo secretario xeral co PSdeG. Lorenzo é así, para Feijóo, "un linguísta independente que o goberno ficha co compromiso de derrogar o anterior Decreto de Política Lingüística e consensuar un novo". "Dixemos hai tempo que creemos que determinados cargos do goberno poden ser independentes; o dixemos e o facemos", abundou o presidente en defensa de Lorenzo.

A partir desa independencia, Feijóo reservouse en varias ocasións durante a súa intervención o control directo sobre o novo secretario. Así, insistiu nas mans libres que terá o novo secretario mesmo obviando en todo momento ao conselleiro de Educación, do que dependerá orgánicamente. Igualmente, indicou que o propio Lorenzo "será o que derrogue o Decreto e informe ao goberno do novo". Por último, preguntado polos prazos, pediu tempo dicindo que "poreille data a Lorenzo cando tome posesión". Sobre os tempos, Feijóo si engadiu que o novo Decreto estará aprobado "dende logo, na primeira parte da lexislatura", lembrando as dificultades que ten o momento actual co curso escolar a piques de rematar.

Pouco tempo necesitou Galicia Bilingüe, tan só unhas horas, para cualificar de "fraude" o nomeamento. A asociación, que durante a campaña electoral apoiou e se viu apoiada polos plantexamentos e propostas lingüísticas do PP, indicou que se sinte decepcionada co presidente da Xunta e que este "non está moi disposto a atender os seus compromisos".

A presidenta da asociación, Gloria Lago, criticou o docente vigués por "estar sempre a favor do proceso de imposición lingüística impulsado polo anterior goberno da Xunta". Así mesmo, recordou que este profesor é un dos responsables da campaña da Universidade de Vigo titulada Europa é plurilingüe. Quen sabe galego sabe máis, iniciativa que considerou unha "manipulación da realidade" sobre o modelo lingüístico de ensino que se segue noutros países.

Lago insiste en reclamar unha política "sen imposicións", con accións, en materia educativa, como a derrogación do Decreto do galego ou a consulta aos pais no sobre de matrícula do próximo curso.

REACCIÓNS

PSOE: “O secretario debe saír das políticas que ten encomendadas”

O PSdeG-PSOE considera que o nomeamento “sen consenso previo” non agoira “nada bo para o acordo necesario” nesta materia. O portavoz de lingua do grupo parlamentario, Francisco Cerviño, di que o problema para a lingua galega “é a liña oportunista e irresponsable” do presidente da Xunta. Segundo Cerviño, o novo secretario debe agora “saír do embrollo de políticas que ten encomendadas e que poden acelerar o agravamento da situación da lingua galega a medio prazo”.

BNG: “Se Lorenzo estivese comprometido coa lingua, dimitiría ao día seguinte”

O voceiro parlamentario en materia lingüística do BNG, Bieito Lobeira, indicou sobre Lorenzo que, con independencia da súa cor política, lle preocupan “as medidas prácticas que vai adoptar” e afirmou que, “se esta persoa estivese comprometida minimamente coa lingua galega, por dignidade, dimitiría ao día seguinte”. Igualmente, dixo que as dificultades atopadas polo PP para ocupar o cargo se deben a que “é difícil aceptar converterse no verdugo legal da lingua”.

CIG-Ensino: “Lorenzo dicía fai pouco que a imposición era unha invención”

O secretario nacional da CIG-Ensino, Anxo Louzao, advertiu de que o sindicato xulgará “polos seus feitos e o seu futuro” e “non polo seu pasado” o novo secretario, que foi un antigo colaborador da responsable deste área durante a Xunta do bipartito, Marisol López. “Fai pouco dicía Lorenzo que era unha invención de sectores minoritarios o que o galego se impoñía e que era necesario estudar medidas que supuxesen un avance”, recordou Louzao, e pediulle que sexa consecuente.

A MESA: “A partir de hoxe xa non está vacante o posto de verdugo para o galego”

O presidente da Mesa pola Normalización Lingüística, Carlos Callón, considerou que o nomeamento supón “camuflar ao lobo con pel de año” e que Lorenzo “pode ser máis guapo ou máis feo, ter máis currículo ou menos currículo, máis ou menos capacidade para enganar”  pero que “a partir de hoxe o posto de verdugo xa non está vacante, o caso é que se trata dun posto de verdugo para o galego”, dixo.  Callón tamén lamentou que haxa “persoas que se presten a este xogo perverso”.

EQUIPOS DE NORMALIZACIÓN: “Debe manter a liña de promoción da lingua que tivo ata o momento”

A Coordinadora Galega de Equipos de Normalización Lingüística foi un dos poucos colectivos que valorou “positivamente” o nomeamento polos seus “coñecementos acreditados” e pídenlle “coherencia” coa liña de traballo e promoción da lingua “que tivo ata o momento”. A Coordinadora recorda que “foi secretario da Comisión Sectorial de Educación no Plan xeral de normalización dá lingua Galega de 2004” no que “se apuntan as medidas incluídas no Decreto” actual.