A Xunta pon enriba da mesa a “segregación” por idioma nas aulas

Vintecatro horas despois de que 40.000 persoas rexeitasen en Compostela un posible “retroceso” no grao de protección do galego, sobre todo no ensino, o Goberno do PP optou por teimar nas súas posturas e incluso levalas un pouco máis alá, xa que o conselleiro de Educación, Jesús Vázquez, suxeriu que analizarán a posibilidade de segregar nas aulas aos alumnos segundo o idioma, reivindicación de organizacións como Galicia Bilingüe que, en principio, a Xunta apartou ao chegar ao poder. O anuncio foi feito polo responsable autonómico do ensino durante a rolda de prensa que ofreceu onte xunto ao novo secretario xeral de Política Lingüística, Anxo Lorenzo, na que ambos sortearon durante máis dunha hora as preguntas dos informadores sobre uns plans lingüísticos que, polo momento, se sustentan sobre unha única premisa á que eludiron dar forma: “O noso compromiso –afirma o conselleiro– é derrogar o decreto”.

Anxo Lorenzo sostén que o decreto que elabore o Goberno de Núñez Feijóo se baseará na “promoción” da lingua galega e no respecto á “liberdade das persoas”. En calquera caso, o secretario xeral recoñece que aínda “non hai un bosquexo” para a elaboración dun documento no que, afirman, “os pais terán moito que dicir” mediante unha “consulta ampla” da que aínda non se coñece o formato e cuxos primeiros pasos, explica o conselleiro, se producirán “xa”. Sobre esa posible elección por parte dos titores legais dos alumnos apunta o conselleiro que, malia á esa consulta, “non é posible unha carta” para cada pai ou nai.

Así e todo, as variacións lexislativas non chegarán ás aulas ata o curso 2010-2011 xa que, di Vázquez, o “axustado” dos prazos fai inviable que o novo decreto estea preparado despois do verán. “Preferimos –explica– tomarnos un tempo prudencial” para elaborar un texto que “ten que perdurar no tempo” e cuxo primeiro borrador podería estar listo o vindeiro mes de xaneiro, momento no que se iniciarían as “consultas” cos diversos colectivos. Mentres tanto, di, a consellería transmitirá “indicacións” aos centros educativos, se ben estas, ao contrario do que inicialmente anunciara o presidente da Xunta, non contradirán as normas vixentes, dado que “mentres non derroguemos o decreto, non podemos actuar contra a legalidade”.

Unha das cuestións máis espiñentas ás que Vázquez e Lorenzo tiveron que facer fronte en reiteradas ocasións ao longo da súa comparecencia foi a vencellada á posibilidade dunha posible separación dos alumnos en función da lingua que os seus pais escollan. Segundo o titular de Educación, a consellería non di, polo momento, “nin si ou non a nada”, nun contexto no que esa posible “segregación” se “pode poñer perfectamente enriba da mesa” se ben, apunta Vázquez, a Xunta non fará “nada en contra da legalidade”no caso de aplicar unha medida que, recoñece, tería “un custo moi elevado”.

Pola súa parte,Lorenzo afirmou “respectar” a manifestación celebrada onte en Santiago, na que máis de 40.000 persoas protestaron contra a derrogación do decreto do galego, pero reiterou que, a pesar diso, a norma “vaise a derrogar”. “É un momento quente, conflitivo arredor da lingua”, admitiu. Por último, o conselleiro recoñeceu que “as galescolas non teñen sentido con este modelo”.