Feijóo non desbota segregar por lingua se os pais o desexan

A vintecatro horas da xuntanza que esta mañá manterá o conselleiro de Educación, Jesús Vázquez, coa Confederación Española de Centros de Enseñanza –a patronal do ensino privado– e coa Confederación Gallega de Asociaciones de Padres de Alumnos, o presidente da Xunta, Alberto Núñez Feijóo, non lle pechou a porta á separación dos alumnos en función do idioma.

Nunha entrevista concedida a Europa Press, Feijóo apostou por manexar “todas as posibilidades” nun escenario no que, tal e como revelou Xornal de Galicia, parte dos representantes das asociacións de pais acudirán ao encontro con Educación levando baixo o brazo propostas elaboradas por Galicia Bilingüe en canto no referido á segregación dos estudantes.

Se ben o xefe do Executivo recoñece que non lle “gusta” a posibilidade de situar en aulas diferenciadas aos alumnos en función do idioma escollido polos seus pais, Feijóo asegura, a renglón seguido, que a lingua na que os nenos aprendan “a ler e a escribir” será “a que elixan os pais”.

Así as cousas, o presidente deixa entrever a posibilidade de facer efectiva a segregación no ensino infantil. “A partir de aí –explica–, sempre que haxa dispoñibilidade de aulas e de recursos, buscaremos que casen os intereses dos pais cos recursos e criterios pedagóxicos”.

Consulta

Precisamente sobre a mesa do encontro que hoxe xuntará a Educación cos representantes das asociacións de pais e nais estará o debate sobre a segregación e, máis concretamente, o formato en que se producirá a consulta aos titores legais dos alumnos de ensino obrigatorio sobre o uso do idioma nas diferentes áreas de coñecemento.

Mentres que, atendendo ao adiantado por este diario, os colectivos contrarios ás medidas de normalización achegarán unha proposta de máximos na que toda a capacidade decisoria recaia nos pais, Feijóo móstrase, polo momento, máis cauto neste extremo.

Así, o presidente da Xunta explica que, ao longo deste mes, Educación consultará con 330.00 pais e nais o modelo lingüístico que desexan. O resultado da enquisa, di Feijóo, será a base para a elaboración do novo decreto que, segundo as previsións do Goberno galego, debera estar en vigor no curso 2010-2011.

Neste sentido, o titular do Executivo galego explica que a finalidade última das consultas será “conxeniar” o bilingüismo coa “liberdade” e trasladar a “amabilidade lingüística da rúa ás aulas”.

Aínda que Feijóo rexeita concretar as porcentaxes de presenza da lingua galega nas aulas pola que apostará o seu Goberno, todo semella indicar que sobre a mesa estará a proposta á que tivo acceso Xornal de Galicia, segundo a cal a presenza do galego ficaría reducida a un 33 por cento do total.
Mentres, Feijóo avoga por “deixar traballar aos técnicos” na elaboración dunha proposta sobre a que, advirte, “se non obtemos o consenso político, si imos consegguir o consenso dos pais”.

A Mesa e STEG

O feito de que Feijóo non pechase onte a porta a unha eventual segregación dos alumnos en función do idioma suscitou de novo as críticas entre os colectivos de defensa do idioma e nos representantes do profesorado.

En declaracións a este diario, o presidente da Mesa pola Normalización Lingüística, Carlos Callón, mostrou o seu rexeitamento a unha posibilidade que, di, demostra que a “folla de ruta” do novo Goberno pasa por “desmantelar a oficialidade do galego”.

Neste contexto, Callón recoñece qeu “tampouco hai un modelo educativo definido polo PP” xa que, apunta, “pasan os días e seguen sen dicir o que van facer”.

Así e todo, e á espera das modificacións legais, o presidente da Mesa lembra que “o decreto aínda está en vigor e vaino estar o próximo curso” polo que, explica, ata que se produza a súa derrogación “son necesarias medidas para que se cumpra” na súa totalidade.

Tampouco o Sindicato de Traballadores do Ensino de Galiza (STEG) se mostrou conforme cos plans do Goberno galego en torno á lingua, así como coa consulta que Educación realizará entre os pais de alumnos.
En opinión deste colectivo, a elección do idioma “non é algo que poidan decidir individualmente as nais e pais, xa que a educación compete a toda a sociedade” galega.

Deste xeito, e “no caso de seguir adiante coa consulta”, o sindicato cuestiona á Xunta sobre “que se preguntará” xa que o cuestionario que se achegue aos titores dos estudantes, din, “pode orientar unha resposta ou outra, polo que pode aproveitar o desprestixio socail do galego para obter unha resposta interesada”.

Neste escenario, o STEG lembra ademais que Educación “ non ten datos” sobre supostos “conflitos lingüísticos” derivados do uso do galego nos centros educativos e suliña que, no encontro mantido entre o sindicato e o conselleiro, Jesús Vázquez afirmou que “todas as posibilidades están abertas” de cara ao futuro decreto, no curso 2010-2011.