Cultura recorta un 25% as axudas ao libro galego

Os editores galegos terán que facer un esforzo económico maior que o ano pasado se queren poñer no mercado obras especialmente custosas e de difícil comercialización. E iso malia a que estas publicacións procuren a “excelencia” ou sexan “obras de importancia para o crecemento intelectual de Galicia”, os requisitos que pon a Consellería de Cultura para solicitar as subvencións destinadas á edición e promoción de grandes proxectos editoriais. O departamento de Roberto Varela vén de recortar un 25,5%, algo máis de 75.400 euros, a contía destas axudas.

A convocatoria, publicada onte no Diario Oficial de Galicia (DOG) pero ditada o pasado 25 de maio, dous días antes de que o conselleiro se reunise coa Asociación de Editores Galegos (AGE) e reiterase o seu compromiso co sector, reproduce case ao pé da letra a do ano pasado. Só hai dúas diferenzas. Unha, de forma, pois na comisión que valorará as solicitudes, ademais do director xeral de Promoción e Difusión da Lectura, o xefe de Servizo de Bibliotecas, a xefa do Servizo do Libro e Publicacións e un funcionario, haberá tamén unha persoa “vinculada laboralmente” co ámbito do libro. A outra, a que máis preocupa ao sector, é de fondo: este ano repartiranse 219.982 euros e non 295.387 como na convocatoria anterior.

Sen noticias da tradución

Outro dato preocupante para os editores é que, a diferenza do ano pasado, cando ambas se publicaron xuntas, no DOG de onte non aparece a convocatoria de axudas á tradución de libros galegos a linguas estranxeiras e viceversa, dotada en 2008 con case 283.000 euros. Non se trata tanto da contía, moi semellante, senón da importancia que a exportación e importación de títulos ten agora mesmo no mercado do libro en Galicia e mesmo do papel que pode ter para o futuro da lingua e a literatura galegas.

Preguntada por ambas cuestións, a Consellería de Cultura evitou dar explicacións polo momento. Cómpre lembrar que hai apenas unha semana, o pasado 27 de maio, o conselleiro asumiu publicamente o compromiso de consolidar as axudas ao sector que puxera en marcha a anterior responsábel do departamento, Ánxela Bugallo. Referíase, explicitamente, a estas axudas, aínda que tamén ao desenvolvemento da Lei do Libro e a Lectura, aprobada durante a pasada lexislatura, á celebración do Ano da Lectura no vindeiro 2010 e á aposta pola exportación do libro galego a través da presenza dos principais axentes do sector nas distintas feiras e foros internacionais.

Segundo fontes do sector, esta decisión de rebaixar as axudas é un “síntoma preocupante” de cara ao cumprimento doutros compromisos adquiridos, ben por Roberto Varela logo da súa de posesión á fronte de Cultura, ben polo Partido Popular a través do seu programa electoral e da súa campaña nas autonómicas. Entre eles, a revisión do programa de gratuidade dos libros de texto aplicado pola ex conselleira de Educación, Laura Sánchez Piñón.