Saramago e Rivas, man a man na Coruña

Os escritores José Saramago e Manuel Rivas participarán hoxe nos Diálogos Literarios de Mariñán. O farán nun acto que terá lugar ás 20.00 horas no auditorio da Fundación Caixa Galicia, onde falarán de "narrar e lembrar".
O Pazo de Mariñán acolleu a inauguración da sexta edición dos Diálogos Literarios de Mariñán, organizados pola Fundación Carlos Casares e, entre outros, a Deputación da Coruña. O acto contou coa presencia da presidenta da Fundación Carlos Casares, do seu homólogo da Deputación da Coruña, Salvador Fernández Moreda, ademais do delegado do Goberno en Galicia, Antón Louro; do director xeral de Promoción e Difusión Cultural, Francisco López Rodríguez; do secretario xeral de Normalización Lingüística, Anxo Lourenzo Suárez, e da directora da Fundación Caixa Galicia, Teresa Porto.
No seu discurso inaugural, o presidente de Deputación da Coruña, Salvador Fernández Moreda, deu a benvida aos participantes "a este singular espazo de creación" como é o Pazo de Mariñán. Fernández Moreda lembrou que os Diálogos Literarios de Mariñán naceron hai seis anos inspirados nos "Encontros de Verines", e dos que Casares foi un dos principais impulsores. "Hoxe os Diálogos Literarios de Mariñán teñen xa personalidade propia e fan realidade o soño do que fora o gran renovador do Consello da Cultura Galega", afirmou Fernández Moreda en alusión a Carlos Casares, a quen definiu como "unha das figuras senlleiras da cultura galega no século XX."
O presidente da Deputación da Coruña manifestou o seu desexo de que esta iniciativa "sirva como homenaxe" a Carlos Casares pois "estes encontros son a expresión máis firme dese espírito dialogante, do bó facer no eido cultural, e fan que hoxe poidamos lembrar ao home, ao intelectual que foi, ao narrador de historias, ao gran conversador, ao amigo", concluíu Salvador Fernández Moreda.