A opinión dos pais será a “base” para o decreto do galego

“Punto de partida das futuras políticas lingüísticas e do inminente decreto do galego”. Esta será, en palabras do conselleiro de Educación, Jesús Vázquez, a consideración que terá a opinión dos pais dos estudantes para elaborar as normas que rexerán a presenza da lingua galega nas aulas.
O propio Vázquez transmitiulle esta premisa aos representantes da Confederación Española de Centros de Enseñanza –a patronal do ensino privado–e mais á Confederación Galega de Pais de Alumnos –que agrupa aos colexios concertados–, a través de senllas xuntanzas na sede da Xunta.
Neste marco, o responsable da política educativa da Xunta explicou que “nos vindeiros días” será pública a data na que Educación lles remitirá aos “pais” unha enquisa para coñecer a súa opinión sobre  o uso da lingua nas diferentes materias académicas.
Apunta Vázquez que o Goberno galego ultima nestes días os “últimos flocos” dunha “consulta” que estará composta por “unha serie de preguntas” adaptadas a cada ciclo educativo. O seu resultado, afirma, non servirá só “como información” para o Executivo autonómico, senón que será “tido en conta” para a elaboración de futuras leis, comezando polo novo decreto.

Infantil na “lingua materna”
Segundo a explicación do conselleiro, a Xunta está a estudar un modelo educativo no que, o ensino infantil teña como base “a lingua materna” do alumnado e, despois deste ciclo, os alumnso se incorporen a “outras linguas”, entre as que se incluiría a galega.
En calquera caso, Jesús Vázquez rexeita dar detalles sobre un proxecto que, afirma, “tratará de chegar ao maior consenso posible” e que estará adaptado, ao mesmo tempo, “ás dispoñibilidades económicas” das arcas públicas galegas.
Precisamente á cuestión financeira alude Vázquez ao ser preguntado por unha eventual “segregación” dos alumnos en función do idioma, tal e como propoñen colectivos como Galicia Bilingüe. Se ben Educación non se mostra partidaria desta posibilidade, o conselleiro asegura que “a mesa está aaberta a que se poida poñer enriba calquera tipo de proposta”.
Sobre esta posibilidade, o presidente da patronal do ensino privado, José Manuel Álvarez, mostrou, ao termo da xuntanza co conselleiro, o seu acordo coa postura da Xunta xa que, explica, “somos partidarios de que los padres tengan derecho a elegir la lengua en que educan a sus hijos”.
Nun sentido semellante expresouse, despois do seu encontro con Vázquez, o presidente de CONGAPA, José Ramón Hermida. Se ben o representante dos centros concertados eludiu “revelar” as propostas que lle transmitiron á Xunta –entre as que, tal e como adiantou Xornal de Galicia, se atopaban as elaboradas por Galicia Bilingüe–, Hermida mostrouse satisfeito cunha xuntanza “tremendamente agradable” na que, di, constatou que a Xunta “está nun camiño moito máis adecuado que o que viñamos sufrindo ata o de agora”.

Feijóo, contra a “imposición”
Tamén o presidente da Xunta reiterou onte a súa aposta por basear as futuras normas lingüísticas na consulta que, di, chegará a “330.00 padres” en toda Galicia.
No transcurso da súa intervención no Forum Nueva Economía, en Madrid, Alberto Núñez Feijóo apostou por un “acuerdo” entre “el PP y el PSOE” para “volver a la normalización lingüística, abandonando la imposición”.
Como exemplo neste sentido, Feijóo destacou ante os presentes a reforma da Lei da Función Pública e a súa intención de “derogar” o decreto que regula o uso do galego no ensino.