Cristina Domínguez, máximo dous anos á fronte do CDG

De asumir a responsabilidade do Centro Dramático Galego (CDG) mentres non se incorpora un novo equipo directivo, Cristina Domínguez estaría nunha situación moi semellante á de Manuel Olveira no Centro Galego de Arte Contemporánea. O director do CGAC seguirá aínda no cargo até finais de ano, segundo fontes da Consellería de Cultura, non porque conte coa confianza do novo titular, Roberto Varela, senón porque é preciso que alguén xestione o museo mentres a Xunta prepara as bases do concurso que previsibelmente ha rexer a elección do substituto de Olveira. O programa electoral do Partido Popular comprometíase a incorporar no seu goberno o que se contén no Documento Cero, un protocolo de boas prácticas na xestión de infraestruturas públicas de arte contemporánea. Isto, na práctica, suporía a convocatoria dun concurso, para o que hai que redactar previamente unhas bases e cuxo proceso de posta en marcha debe pasar distintas fases e consultas en diversos foros. Todos estes pasos situarían a Olveira á fronte do CGAC, cando menos, nos vindeiros cinco ou seis meses. No caso de Domínguez, cuxa xestión foi menos contestada polo PP e os medios de comunicación afíns cando Núñez Feijóo estaba na oposición, a ‘prórroga’ podería chegar aos dous anos, límite que a directora en funcións do Centro Dramático Galego se marca nesta etapa da súa carreira profesional.