Microsoft négase a detallar o seu contrato millonario coa Xunta

O caso Microsoft continúa a enredarse. A multinacional négase a especificar os termos do contrato de 2,2 millóns de euros que lle foi adxudicado pola Xunta sen publicidade para a adquisición de novas licenzas na Administración. Malia a polémica desatada tras a información de Xornal, a empresa pásalle a bóla ao Goberno galego, que tampouco explica as condicións do acordo malia as preguntas da oposición.

Ante os intentos deste diario por coñecer os termos do millonario contrato, Microsoft limítase ás explicacións da Xunta e "roga" que as preguntas lle "sexan trasladadas ao organismo competente do Goberno galego".

O Executivo de Núñez Feijóo adxudicou a principios do mes
pasado un contrato de 2,2 millóns de euros a Microsoft para a adquisición de novas licenzas na Administración e a renovación das xa existentes. O concurso, da Consellería de Presidencia, Administracións Públicas e Xustiza, realizouse mediante un procedemento negociado sen publicidade e non foi publicado no Diario Oficial de Galicia (DOG). Todo, malia a elevada contía económica, en concreto 2.215.680,54 euros que recibirá a multinacional estadounidense.

Ademais, non se convocou en ningún momento a mesa de contratación e o prazo que se lle deu a Microsoft para contestar, desde o inicio do expediente, foi de cinco días e cunha fin de semana por medio. Non fixo falta, xa que a multinacional non tardou nin 24 horas en aceptar as condicións.

O inicio do expediente do contrato produciuse o 16 de abril e o informe técnico foi realizado por Jorge Remuiñán, subdirector xeral de Servizos de Informática e Telecomunicacións con Méndez Romeu. A pesar de que en mans do Partido Popular estaba a paralización do expediente se non o consideraba adecuado, o 6 de maio Beatriz Cuiña Barja, secretaria xeral de Presidencia, asinou a resolución de adxudicación provisional.

A falta de publicidade e o escurtantismo que arrodean o acordo non impiden o silencio de Microsoft ante as preguntas deste diario. "Todas fan referencia a un contrato coa Xunta, así que as preguntas deben ir dirixidas a esta", insisten, malia que algunha das cuestións se referían unicamente aos produtos que se incluían no contrato ou ao tempo que levaba a multinacional traballando co Goberno galego.

O que é claro é que a oferta de Microsoft cumpre co demandado no prego de condicións, tal e como recolle o expediente, que tamén aclara: "Solicitouse unha soa oferta á empresa Microsoft Ireland Operations Limited por ser a propietaria do produto, recibindo a oferta o día 17 de abril de 2009". "A avalición -do concurso- non procede ao existir unha única oferta que cumpre o demandado", engade.

Desde a publicación do caso por Xornal de Galicia, o PP limitouse a asegurar que a responsabilidade era do anterior conselleiro de Presidencia, José Luis Méndez Romeu. O presidente da Xunta, Alberto Núñez Feijóo, asegurou que o contrato coa multinacional "era a opción menos mala". Segundo fontes populares, o acordo foi ratificado por carácter urxente, xa que algunha das licenzas que se van renovar caducaban e era necesario non frear o procedemento, iniciado co anterior Executivo.

Méndez Romeu limítase a matizar que "o contrato, formalmente, foi asinado polo actual Goberno". Así, tanto PSdeG como BNG rexistraron no Parlamento nos últimos días iniciativas e preguntas para ser contestadas polo Executivo en comisión e,s e o permite o PP, no pleno da Cámara.