As enquisas aos pais serán a "base" para derrogar o decreto do galego

O conselleiro de Educación, Jesús Vázquez, e o secretario xeral de Política Lingüística, Anxo Lorenzo, presentaron esta mañá ante os medios a enquisa que, ao longo da vindeira semana, a Xunta lles fará chegar aos pais dos alumnos de Infantil, Primaria, Secundaria e Formación Profesional co obxectivo de coñecer as súas preferencias no relativo ao uso do galego no ensino.

O inquérito que, segundo recoñece o conselleiro, será o "punto de partida" para a "derrogación do decreto de galeguización do ensino", consta de catro preguntas que poderán ser "respostadas "polos pais ou polos fillos", nun contexto no que, tal e como avanzara Xornal de Galicia, cada núcleo familiar recibirá "tantas enquisas como fillos teña". Neste cuestionario, a Xunta formula cuestións sobre a lingua en que os pais "preferirían que o seu fillo cursase as materias troncais", en torno ao idioma en que "preferiría que estivesen escritos os libros de texto e outros materiais didácticos" ou sobre a lingua a empregar "nas probas orais e escritas".

As direccións dos centros educativos terán ata o vindeiro día 19 para devolver a Educación unhas enquisas que terán carácter "confidencial" e que, di o conselleiro, serán o "punto de partida" para a elaboración do novo decreto. Neste escenario, Jesús Vázquez asegura que a Xunta "entende" que "van participar o 100% dos pais" galegos, se ben apunta que, independentemente do grao de participación, as súas respostas serán a base da norma que regulará o uso do idioma no ensino. "Toda a opinión dos pais -di- será respectable". Neste sentido, e diante dunha eventual baixa participación, Vázquez apunta que "nas eleccións europeas" do vindeiro domingo "ao mellor non se chega ao 40%".