Unha enquisa sen fiabilidade será a base do novo decreto do galego

Inicio do “proceso que concluirá coa derrogación do decreto de galeguización do sistema educativo de Galicia”. Deste xeito resume o conselleiro de Educación, Jesús Vázquez, o significado da enquisa que a vindeira semana chegará aos 1.490 centros educativos do país co uso da lingua como argumento.
No transcurso dunha rolda de prensa multitudinaria e cun ton sensiblemente máis brusco que nas súas anteriores comparecencias –“unicamente”, advertiu o conselleiro, “respostaremos preguntas que teñan que ver coa enquisa”–, Vázquez presentou un inquérito que, di, está chamado a ser o “punto de partida” do novo decreto que regule o uso do galego no ensino.
Educación distribuirá dende o luns 330.000 cuestionarios divididos en catro modelos:  Infantil, Primaria, Secundaria e Formación Profesional. Neles, a Xunta insta aos pais, a través de catro preguntas bilingües, a expresar “en que lingua preferiría que o seu fillo cursase as materias troncais” ou o idioma en que “preferiría que estivesen escritos os libros de texto”.
Así, “os pais ou os fillos” poderán escoller entre un abano de respostas que vai dende “todas en galego” a “todas en castelán”, pasando por “unhas en galego, outras en castelán”, sen deixar lugar a un modelo equilibrado entre ambos idiomas.
A compañado polo secretario de Política Lingüística, Anxo Lorenzo, o conselleiro insistiu na representatividade dunha enquisa que será “decisiva” independentemente do grao de participación –”nas eleccións europeas”, xustifica, “ao mellor non se chega ao 40 %”–.
Ao tempo, Vázquez defende a lexitimidade dun inquérito no que, tal e como adiantara Xornal de Galicia, cada familia cumplimentará  “tantas enquisas como fillos” teña, co mesmo valor final.

Procedemento da consulta

Segundo a explicación do conselleiro de Educación, as direccións dos centros educativos recibirán, ao longo da vindeira semana, un número de enquisas igual ao continxente de alumnos matriculados. Serán os propios centros os encargados de distribuír os cuestionarios entre os estudantes e de recoller, antes do día 19, as respostas dentro dun sobre con “sistema de pegado autoadhesivo para que os datos queden ocultos”. Os directores, que “terán a instrución de realizar o seguemento” da consulta “mediante lista”, deberán introducir as enquisas recibidas nunhas “bolsas feitas ad hoc” para este proceso, xunto cun “parte de incidencias” no que reflictan os posibles inconvenientes atopados na propia consulta.
Unha vez finalizado o proceso nos centros, que estará baixo o control da inspección educativa, a consellería recibirá os inquéritos e “un equipo habilitado para tal fin procesará os datos nun tempo estimado de 5 a 10 días”. Malia a dar conta deste proceso, Jesús Vázquez rexeitou explicar ante os xornalistas o xeito en que os datos serán computados, así como o peso que as respostas terán sobre a elaboración do novo decreto ou o xeito en que a Xunta evitará a manipulación das respostas.