A escola galega mobilízase ante os anuncios da Xunta

As cautelas que, inicialmente, mostraron os diferentes colectivos vencellados ao ensino despois das eleccións do 1 de marzo diante dos plans lingüísticos do novo Goberno estanse a transformar, paulatinamente, en vontade de desenvolver accións conxuntas e organizadas.

Despois da participación de moitos destes colectivos na manifestación en defensa do galego do pasado 17 de maio, as asociacións de pais, sindicatos e movementos pedagóxicos, entre outros, prevén mostrar de xeito conxunto o seu rexeitamento a unha eventual desprotección da lingua por parte da Xunta.

Os primeiros pasos de cara a esta organización daranse, segundo fontes consultadas por Xornal de Galicia, na xornada de mañá cando, a través dunha xuntanza en Santiago, moitas destas agrupacións, así coma os equipos de Normalización Lingüística dos centros de ensino, valorarán a posibilidade de emprender accións coordenadas.

Anpas de Compostela

Algúns dos colectivos que nos últimos días está a mostrar a súa “preocupación” diante da posible “redución das materias impartidas en galego” son as asociacións de nais e pais do ensino público.

Nesta dirección, na xornadad e onte a Federación Municipal de ANPAS de Colexios Públicos de Compostela expresaba, a través dun comunicado, o seu rexeitamento ás “primeiras medidas do novo Goberno autonómico na materia”

Segundo as nais e pais de alumnos dos centros da capital, unha menor presenza do galego nas aulas “limita a adquisición real das competencias lingüísticas” dos alumnos e, “no futuro”, din, “pode situar a un número significativo dos actuais estudantes en inferioridade de condicións no acceso a moitos postos de traballo.

Do mesmo xeito, as ANPAS compostelás rexeitan a enquisa que, dende mañá, distribuirá a consellería de Educación co obxectivo de coñecer a lingua que “prefiren” os pais dos estudantes na escola.

“Pensamos –di este colectivo– que a educación é un asunto de todos e todas e que as decisións sobre a lingua de ensino correspóndenlle á cidadanía no seu conxunto”. Dende o seu punto de vista, este inquérito “pretende”, ademais, “crear un conflito que oculte os verdadeiros problemas da educación.

Sentenzas

Ao tempo, este colectivo de pais e nais resulta “máis rechamante cando o Tribunal Supremo acaba de volver negar, en relación con Educación para a Cidadanía, que poida haber un ámbito de elección para os pais no relativo á fixación do currículo escolar”.

Así, conclúen que “amparándose nunhas suposta liberdade”, estas medidas “estaríanlles restando competencias aos nenos” nunha “etapa fundamental” da súa formación.