O PSOE vincula co Opus Dei os proxectos lingüísticos de Núñez Feijóo

En opinión de Lage Tuñas, “detrás das primeiras decisións de Feijóo vese a influencia de sectores ultras e tamén a man do Opus Dei”. Neste sentido, di, “só cabe recordar que a primeira iniciativa que apoiaron no Parlamento é a da Red Madre –auspiciada por colectivos antiabortistas–”.

Dende o punto de vista do deputado do PSdeG, estas mesmas vinculacións levaron o presidente da Xunta a “romper o consenso lingüístico” e “utilizar a lingua para confrontación política”, mesmo “borrando dun plumazo toda a política lingüística da etapa de Manuel Fraga”

Anxo Lorenzo

Neste contexto, Lage Tuñas manifesta ademais a súa “incredulidade” polo “papel” do novo secretario xeral de Política Lingüística, Anxo Lorenzo, nas medidas anunciadas pola Xunta.

Segundo o socialista, Lorenzo “está sendo cómplice polo seu silencio nun Goberno que cada día anuncia unha nova decisión contra a lingua galega”. “Paréceme triste –di–, porque a súa traxectoria indicaba xustamente o contrario”.

Así, Lage censura a “complicidade” do secretario xeral coa “ofensiva brutal” que, ao seu xuízo, supoñen medidas como a “modificación da Lei da Función Pública” no vencellado ao uso do idioma nas oposicións.