O PP gaña forza en Galicia mentres o BNG obtén o seu peor resultado en vinte anos

A resaca do 1-M pode vivirse con euforia no PPdeG. Tras o regreso dos populares á Xunta, os resultados das eleccións europeas en Galicia dan aínda máis forza ao partido que lidera Alberto Núñez Feijóo, que obtivo o 50,6 dos sufraxios, o que supón un crecemento de catro puntos en relación ás autonómicas –de tres respecto ás últimas continentais de 2004– e confirma a Galicia como un dos territorios centrais para un PP que tamén gañou a nivel estatal. Pola súa parte, o PSOE foi capaz de amosar unha leve recuperación mentres que o BNG volve caer e obtén o seu peor balance en vinte anos.

Certo é os resultados duns comicios ao Parlamento de Bruxelas sempre deben de ser tratados con prudencia e están sometidos á forte abstención, que nesta ocasión moveuse no 48 por cento, pero o escaso tempo pasado dende a vitoria do PP no primeiro de marzo e a convulsión que a mesma creou na política galega obriga a enlazar ambos datos, circunstancia que presenta un escenario feliz para os populares, lixeiramente relaxado para os socialistas dende a súa visión particular pero dramática dende claves de alternativa, xa que –a falta do voto exterior– o fracaso do BNG amplía a sete puntos a vantaxe do PP respecto a un hipotético bipartito, distancia que tras as autonómicas era de apenas unhas décimas, sempre antes do polémico sufraxio emigrante, que acabou dándolle maior porcentaxe ás forzas progresistas que á gobernante.

Recibe pulo o PPdeG nas europeas. Na oposición, o PSdeG pódese permitir algunha lectura positiva, misión moi complicada para o Bloque. Porque os socialistas baixan un punto menos a nivel galego que estatal respecto a 2004, pero ademais melloran o tanto por cento en relación ao 1-M. Con Touriño presentado como “o Presidente”, o PSOE obtivo o 31% dos sufraxios. Con Manuel Pachi Vázquez acabado de chegar ao liderado da organización, soben ata o 34,25. Supón este resultado certo balón de osíxeno para os socialistas galegos, que -en algo que non adoita ser habitual– logra diferenciarse así do seu núcleo estatal, algo que no que podería ter que ver as moitas chiscadelas galeguistas que lanza o PSdeG nas últimas semanas, que semella que lle serviron para entrar no solo electoral do BNG, de novo en descenso.

Baixa do dez por cento o Bloque. Chegaban os nacionalistas aos comicios nun intre complicado, en medio dunha longa discusión interna que acabou hai menos dun mes e logo dun cambio de aliados europeos. A coalición coa que acudiron á cita electoral cambio CiU e PNV por ERC e Aralar. Non lles foi moi ben a eles. Nin ao BNG con eles. Obtiveron un acta que, polo sistema rotatorio, levará á súa candidata Ana Miranda a Bruxelas. Porén, iso non agocha o golpe. Perden case 40.000 votos respecto ás últimas europeas e algo máis de seis puntos en comparación coas autonómicas, que xa foron duras. Pero é na evolución histórica onde se encenden todas as alarmas para a formación nacionalista. Os 102.326 apoios supoñen –sendo un número nada marxinal– o peor resultado do Bloque nos últimos vinte anos. A organización que lidera Guillerme Vázquez non se movía neses datos dende as autonómicas de 1989, cando se fixeron con cinco escanos. Daquela comezou a longa era Fraga. Hai quen viu onte indicios de longa era Feijóo. Aínda é cedo, pero o PPdeG está en forma.