O ensino organízase contra a enquisa

Os contactos entre os diferentes colectivos da comunidade educativa galega multiplicáronse no día de onte cun obxectivo común: mostrar o seu rexeitamento á enquisa sobre o uso do galego nas aulas que a consellería de Educación distribúe dende o pasado luns.

Despois dunha primeira xuntanza, celebrada o pasado luns, fontes sindicais consultadas por Xornal de Galicia dan por seguro que, ao longo da xornada de hoxe, verá a luz un “documento” que agrupará a en torno a unha decena de organizacións e que, dirixido esencialmente aos pais, explicará os motivos deste rexeitamento.



“Deslexitimar a consulta”

Mentres o conxunto de colectivos ultiman este acordo, organizacións sindicais como a CIG-Ensino –que, previsiblemente, tamén participará do documento común– continúan a posicionarse diante do inquérito no que a Xunta apoiará o novo decreto de uso do galego no ensino.

Dende o punto de vista do seu secretario xeral, Anxo Louzao, cómpre “deslexitimar” unha enquisa que, lembra, “nin sequera” ofrece a “opción” de elixir un ensino integramente en galego.

Así as cousas, a central sindical avoga por “explicar” aos proxenitores que “a mellor maneira” de mostrar a súa preferencia pola presenza da lingua propia nas aulas é elixir a opción “de todo en galego” tendo en conta que esta “totalidade” se refire unicamente ás materias troncais.

Neste escenario, o sindicato anima aos pais dos alumnos a, no apartado destinado a “observacións” dentro do formulario distribuido pola Xunta, suliñar a necesisade de que “se aplique o Plan Xeral de Normalización Lingüística” e o decreto aprobado polo bipartito.



“Toda a sociedade ten dereitos”

Outro dos colectivos implicados neste posicionamento común, o Sindicato de Traballadores do Ensino (STEG), manifesta a súa intención de “apoiar en todo o posible” as accións de protesta.

Neste sentido, o STEG avoga por facerlle chegar aos pais que “toda a sociedade ten dereito a decidir que lingua se fala e se ensina nas escolas”, dado que os pais dos alumnos “non poden reivindicar o derito ao descoñecemento dunha lingua” por parte dos seus fillos no marco do currículum escolar que, lembran, compete á Administración.