O conselleiro de Educación discrimina aos lectores de Xornal de Galicia

A Consellería de Educación que dirixe Jesús Vázquez discrimina aos lectores de Xornal de Galicia, posto que decidiu non publicar neste medio a publicidade a favor da súa polémica enquisa aos pais sobre as súas preferencias lingüísticas, como si fixo noutros periódicos, algún deles coa súa sede en Madrid, como é o caso do ABC, tradicionalmente achegado a posicións conservadoras.

Malia ser o único periódico galego realmente bilingüe grazas á importante presenza coa que conta o idioma galego nas súas páxinas, Xornal de Galicia foi un dos escasos medios escritos diarios de Galicia que quedou fóra da medida de Educación e o único apartado dos que abranguen todo o territorio da comunidade, xunto a Galicia Hoxe, que se publica integramente en lingua galega.

A versión oficial da Xunta de Galicia para xustificar a súa decisión discriminatoria foi “a contención de gastos”. Os anuncios non se limitan a pedir a participación dos pais na enquisa senón que engaden conceptos como “a Xunta está a traballar nun novo decreto que garanta un ensino de calidade” de matiz claramente político.

Nas últimas semanas, Xornal de Galicia deu voz non só á postura da Xunta senón tamén á dos colectivos políticos, sociais ou educativos que amosaron posicións contrarias á enquisa aos pais organizada por Educación e fixeron pública a súa “defensa” do que o Estatuto define como “lingua propia de Galicia”.