Os centros, obrigados a controlar cantos pais cubren a enquisa

A consellería de Educación continúa a empregar o correo electrónico para informar aos directores dos centros de ensino das súas obrigas na realización da enquisa sobre o uso da lingua galega nas aulas.

Despois de que, na xornada do xoves, o departamento dirixido por Jesús Vázquez instase ás directivas de colexios e institutos a “prohibir” calquera “acción ou acto, tanto a favor como en contra” da enquisa, a Xunta enviou onte unha nova comunicación indicándolles aos directores as súas obrigas de control sobre o inquérito.

Segundo a instrución da consellería, os centros deben ter en conta a “obrigatoriedade de xustificar cada unha das enquisas que se envían”.

Do mesmo xeito, Educación explica que “o director do centro debe asinar e selar dous xustificantes por cada alumno cos seus datos: un para a familia e outro para a consellería”.

“Legalidade” das instrucións

A nova orde do Goberno galego xerou, ao longo da xornada de onte, mostras de rexeitamento que se suman á da propia instrución referente ás eventuais protestas contra a propia enquisa.

Mentres fontes xurídicas consultadas por Xornal de Galicia expresan as súas dúbidas sobre a “legalidade” do labor de control que deberán desenvolver os directores –manexarán, ademais de datos persoais, a información sobre as familias que respostan ao inquérito e aquelas que non o fan–, sindicatos como a CIG-Ensino continúan a mostrar o seu rexeitamento ás medidas da Xunta.

En opinión da central sindical, a consellería está a desenvolver unha “campaña política” a través do que cualifican como “prohibicións intimidatorias” que, din, tratan de “amedrentar” aos docentes.

Neste sentido, a CIG apunta que o impedimento de “opinar” sobre a consulta “impide que os equipos de normalización realicen as funcións que lles fixa o artigo 87 do Regulamento Orgánico” dos institutos de secundaria, que regula o labor dos equipos á hora de “proporcionar información” sobre a lingua.

Mobilizacións

A controversia en torno á enquisa chegou onte de novo ao eido parlamentario. Dende o Pazo do Hórreo, a deputada nacionalista Carme Adán afirmou que, resulta “incoherente” que o conselleiro de Educación, malia a non “parar de repetir a palabra liberdade, decrete unha prohibición como unha das súas primeiras medidas”.

Neste contexto, Adán pregúntase se Vázquez “vai buscar os consensos dos que tanto falar” ou, pola contra, “o seu ánimo é de exercer prohibicións da liberdade de expresión”.

De xeito paralelo, diversos colectivos e centrais sindicais continúan a anunciar mobilizacións de rexeitamento ás medidas da Xunta.

Así as cousas, a CIG-Ensino celebra esta mañá unha asemblea de directores para “acordar unha resposta axeitada ao compartamento intimidatorio” da inspección educativa. Mentres, os tres sindicatos maioritarios e A Mesa pola Normalización Lingüísticaconcentraranse o vindeiro martes para rexeitar a eliminación do galego dos exames de oposición da Xunta.