Belixerancia política na web da Xunta

“Agustín Hernández acusa a PSOE e BNG de vender fume”, “Economía acusa ao BNG de mentir” ou “Traballo lamenta a desinformación do BNG”. Todos estes titulares, que ben poderían formar parte da crónica política de calquera diario galego, forman parte, dende finais do pasado mes de abril, da produción informativa habitual do gabinete de comunicación da Xunta de Galicia.

Este tipo de novas, publicadas polo Goberno galego na súa páxina web oficial e, en moitos casos, enviadas aos medios de comunicación a través de notas de prensa, adquiriron, co cambio de Goberno, unha especial belixerancia cara aos grupos da oposición que está a causar extrañeza mesmo nos propios xornalistas de San Caetano.

Se ben o Goberno bipartito tamén empregaba con asiduidade o portal institucional da Xunta para aclarar ou responder acusacións da oposición –entón liderada por Alberto Núñez Feijóo–, o Executivo de PSOE e BNG transmitía aos seus xornalistas unha regra de ouro que, segundo relata o traballador do gabinete de comunicación dunha consellería do bipartito, pasaba por non “atacar” ou “responder” directamente a un partido político “en ningún caso”.

Mentres, os novos responsables da Administración autonómica están a optar por un ton sensiblemente máis belixerante, ata o punto de terciar, empregando as canles institucionais, nos tirapuxas parlamentarios entre Goberno e oposición.



Consellerías máis belixerantes

Se ben esta práctica é xeralizada no conxunto dos departamentos do Goberno galego, a crítica política a través das notas de prensa e do portal web do Executivo é especialmente habitual en consellerías como a de Territorio, Medio Ambiente e Infraestruturas.

Así, na páxina da Xunta é posible atopar informacións nas que o departamento que dirixe Agustín Hernández destaca que “o PSOE quere que a Xunta, co diñeiro de todos os galegos, pague as peaxes que ten que asumir o Estado, mentres o Goberno central subvenciona as doutras comunidades”.

Tamén desta consellería procede a noticias que deu lugar a unha das controversias políticas das últimas semanas: os supostos excesos da ex responsable de Vivenda, Teresa Táboas, no referido aos gastos de publicidade.

A través dunha nota de prensa, Medio Ambiente “pregunta” ao portavoz nacional do BNG, Guillerme Vázquez, “por que en época de crise a consellería de Vivenda destinou case 7 millóns a publicidade”

No mesmo texto, o Goberno galego “pide a Guillerme Vázquez que responda da xestión dos cartos públicos que fixo o seu partido” e “explique aos cidadáns, sen demagoxia, por que comprometeu gastos por un importe moito maior que os ingresos xerados”.

Así e todo, non é só Agustín Hernández o único membro do Goberno que opta por enviar andanadas dialécticas a socialistas e nacionalistas a través de condutos institucionais. Este é o caso, por exemplo, do presidente de Portos de Galicia, José Manuel Álvarez Campana.

Tamén no sitio web da Xunta, Álvarez Campana saíu ao paso dunhas declaracións da secretaria de organización do PSdeG, Mar Barcón, a respecto do porto exterior da Coruña. No texto, o presidente de Portos “pide a Mar Barcón que dedique os seus esforzos a conseguir que Fomento se comprometa co porto exterior”.

No mesmo texto, o titular deste organismo tildade “incoherentes” as “declaracións” da socialista e reclama que Barcón “deixe de pór trabas e se una á defensa deste proxecto”.

Tamén a consellería de Traballo e Benestar ten empregado a páxina da Xunta en Internet para responder a posicionamentos públicos dos grupos da oposición, neste caso, do BNG.

Despois de que os nacionalistas dubidasen ante os medios de comuniación dos proxectos do gabinete de Feijóo relativos á Lei de Dependencia, o departamento de Beatriz Mato cargou as tintas contra o Bloque vía web.

Nesta ocasión, a consellería subliña que “lamenta a desinformación e ínstao a non facer demagoxia coa Lei de Dependencia”. Do mesmo xeito, Mato “recoméndalle” á formación frontista “que se asesore mellor antes de falar sobre as políticas sociais”

Os condutos informativos da Administración autonómica están a ser empregados por parte do Goberno para, ao tempo, verquer críticas sobre diferentes medidas do Goberno bipartito.

A política que os membros da oposición tildan como “de levantar alfombras” concrétase en novas como a que, o pasado 8 de xuño, reflectía que “o conselleiro de Industria acusa ao BNG de mentir e converter o concurso eólico nunha chapuza legal”.

Nun ton semellante, o Goberno destaca, por exemplo que Teresa Táboas “gastou en 2008 3,5 millóns de euros en publicidade, case o mesmo que en axudas ao aluguer”.