O proceso da gratuidade dos libros de texto está paralizado

A tan só cinco días de que remate o curso escolar, nin os directores dos centros educativos, nin os pais dos alumnos, nin tan sequera libreiros e editores coñecen o sistema de financiamento dos libros de texto para o vindeiro ano. A Consellería de Educación aínda non publicou no DOG a orde que establece as disposicións do programa de gratuidade dos textos para 2009-10. Este documento acompáñase dun anexo que os titores deben presentar nas librarias para solicitar o material e que os directores do centro tiñan no seu poder o ano pasado o 15 de maio, razón pola que nestes momentos o proceso se atopa paralizado.

A pesar da preocupación que manifestan pais e docentes, dende Educación aducen que están traballando na Orde, pero non precisan cando se fará pública. Afirman que a consensuarán con todos os sectores implicados e que, malia que o PP levaba no seu programa electoral a retirada do actual sistema de préstamo, para garantir aos menores a titularidade dos manuais, nada está decidido. “Séguese estudando, o que non significa que se vaia a suprimir”, din.

José Ángel Suárez Alonso, presidente da Asociación de Directores de Institutos de Galicia, afirma que entre o colectivo esta situación se vive con “malestar”. “Está todo retrasado e os alumnos teñen que saber nunha semana cal é a súa situación para o ano que vén porque a gratuidade conleva moita burocracia; a Consellería estanos facendo partícipes desta situación, precisamente no momento no que temos máis carga de traballo”, asevera.

Suárez Alonso considera que non é viable modificar o sistema de cara o próximo periodo escolar dado que non recibiron ningún tipo de información por parte da Xunta. “O decreto tería que pasar por varios trámites ata chegar ao Consello da Xunta e non queda tempo; ademais, sería unha medida moi impopular”, segundo valora.

A gratuidade dos libros mediante préstamo afecta a alumnos de Primaria e Secundaria, pero o presuposto de Educación para este cometido contempla tamén a reposición de volumes deteriorados e o aumento da demanda, xa que os cursos non son homoxéneos e o lote doutros anos pode ser insuficiente.


Porta a porta

Namentres todas estas cuestións estaban pechadas o ano pasado a estas alturas, se o 22 deste mes (data na que remata o curso) os directores non coñecen o procedemento a seguir, non poderán notificarlle aos pais cando teñen que recoller a documentación para solicitar os volumes a través dos nenos, polo que terán que chamar individualmente a cada familia.

A falta de operatividade da Xunta provoca que as librarias estean tamén pendentes de facer os pedidos as editorias, xa que, normalmente, reservan en función das solicitudes formuladas a través dos anexos que acompañan á orde do DOG.

Antonio Fernández Maira, coordinador da Federación de Libreiros de Galicia, afirma que no sector hai “precupación porque estamos enriba das datas; as listas teñen que estar publicadas antes de fin de mes. Dende o 15 de xuño hai centros que as teñen, pero outros non”. Considera que “sería unha chapuza modificar o sistema con tan pouco tempo” e que “os máis afectados son as familias porque terán que solventar o tema durante as vacacións de verán ou en setembro e é un follón”.

Como a Asociación Galega de Editores (AGE), os libreiros non ven negativo que se cambie o sistema. O presidente de AGE, Alfonso García Sanmartín, di que defenden a gratuidade en función da renda e sempre que os alumnos manteñan a propiedade dos textos, para dar viavilidade ao sector. Non obstante, recoñece que o mellor sería “ter o decreto fóra” a estas alturas.

Pola súa parte, Virgilio Gantes, presidente da Confederación galega de Anpas de centros públicos (Confapa-Galicia), afirma que o conselleiro de Educación, Jesús Vázquez, lles ratificou que non eliminaría a gratuidade e que facelo, “sería unha barbaridade”.