Cibrán Arxibai: “Hai rapaces que cubren sós a enquisa”

Cibrán Arxibai é profesor de Matemáticas no IES Pintor Colmeiro de Silleda. Enquisas ziscadas polo chan ou unha morea de mozos preguntándolle como se cubría a consulta da Xunta aos pais sobre o emprego das linguas no ensino foi o que atopou cando os formularios comezaron a ser repartidos a finais da pasada semana. “O proceso de recollida da consulta é totalmente irregular”, comenta.

Afirma que moitos alumnos cubren eles mesmos a enquisa aos pais.
As enquisas son repartidas por un membro do equipo directivo aos alumnos, e na teoría, eles teñen que levar a consulta a súa casa para que os pais as cubran e logo as entreguen. Sei dalgúns rapaces que as cubrían eles sen entregarllas aos pais. Incluso algúns preguntaban como se cubría.

Cúbrense todos os formularios xa sexa polos pais ou polos alumnos?
O outro día vin ziscados no chan varios formularios da enquisa nun recreo do instituto.

Vostede afirma como profesor da materia de ‘Métodos Estatísticos’ que a enquisa non é fiable.
Non sei porque non se fixo un estudo sobre a fiabilidade do cuestionario. Bastaría con preguntarlle a unha empresa seria que se adique á realización de enquisas. Preguntaríalle a estas empresas se eles se atreverían a firmar os resultados deste proceso e cal é o seu nivel de confianza, se están acotados os erros e a canto ascenden estes. En calquera enquisa fanse niveis de confianza e de estimación e para que sexa máis fiable escóllese unha mostra aleatoria. Aquí non hai mostra aleatoria e, entre outras cousas, os pais que teñen máis dun fillo poden contestar varias veces.