Os galegos valoran mellor a Feijóo que a Rajoy, o seu líder estatal

As estadísticas seguen sorrindo ao presidente da Xunta, Alberto Núñez Feijóo, que montado na onda das súas vitorias electorais foi designado onte, segundo unha enquisa do CIS, como o líder político máis valorado de Galicia, nun sondeo no que aínda non computan as novas cabezas visibles da oposición, o socialista Manuel Vázquez e o nacionalista Guillerme Vázquez, pero si os seus predecesores Emilio Pérez Touriño e Anxo Quintana, que obteñen un 4,4 e un 3,4, respectivamente, ante o 5,1 do popular. Porque tamén en clave interna do PP sae moi reforzada a figura de Feijóo, xa que supera en valoración ao seu líder estatal, o pontevedrés Mariano Rajoy, ao que avantaxa en nove décimas. O líder da oposición en Madrid obtén un 4,2 tamén inferior á puntuación do presidente do Goberno, José Luis Rodríguez Zapatero, cun 4,5.

Os datos saen da enquisa postelectoral de Galicia sobre as eleccións autonómicas, elaborada con preto de 3.000 entrevistas en marzo de 2009 e publicada onte polo Centro de Investigacións Sociolóxicas (CIS) nun traballo que ofrece un bo número de conclusións sobre o 1-M, especialmente no que atinxe ás circunstancias da caída do bipartito, por exemplo no efecto da dura –ás veces sucia– campaña electoral.

Campaña

Un 24 por cento dos enquisados afirma que decidiu o seu voto durante ese período, marcado polas acusacións e o enfrontamento en no que boa parte dos analistas botaron de menos unha posición máis firme por parte do candidato socialista, daquela presidente. A propia campaña é cualificada no seu conxunto polos votantes das tres forzas, con resultados ben distintos. Unicamente o dez por cento dos que apoiaron ao PSdeG e o sete por cento dos que o fixeron ao BNG consideran que foi boa ou moi boa, o que sobe ao 31 no caso dos partidarios do PP, que tamén cren de xeito maioritario que o seu partido mellorou en campaña, ao contrario do que ocorre coas dúas forzas do bipartito.

En canto ás razóns que tiveron os votantes en conta á hora de depositar o seu sufraxio, o 22,8 apostaron polo regreso o PP á Xunta ou o remate do Goberno progresista, mentres que nun superior 23,5 pesou o desexo da vitoria da esquerda ou a preocupación por unha volta dos populares. Só un 6,7 votou para reducir a influencia do nacionalismo. Pola súa parte, a abstención prexudicou á esquerda, posto que un vinte por cento dos que se abstiveron afirman que terían votado ao PSOE e un oito por cento ao Bloque, que xuntos reúnen un 28% que supera con claridade ao 19% que de ter votado faríao polo PP.