Táboas: “Temos que seducir a ese 10% que non se identifica co BNG"

Os datos da enquisa feita pública o mércores polo Centro de Investigacións Sociolóxicas (CIS) tras as eleccións galegas foron recibidas con especial reflexión no ámbito da esquerda e o nacionalismo, onde chamou a atención o dato de que mentres o 23,8 dos entrevistados declárase nacionalista, só o 12,8 afirma indentificarse co BNG.

A coordinadora da Executiva do Bloque, Teresa Táboas, interpretou eses datos en clave positiva, pero tamén deixando un reto riba da mesa da propia organización, e por tanto dela mesma. “O CIS demostra que hai un sentimento nacionalista forte no país e agora o reto do BNG é seducir a ese dez por cento que segundo a enquisa comparte nosas posicións en xeral malia que non nos dea un apoio directo”, asegura. A dirixente do BNG tamén aproveitou o inquérito para lanzar unha mensaxe ao PP e ao Goberno da Xunta. “Ultimamente gústalles moito dicir iso de que somos unha minoría e só representamos ao dez por cento, algo que nin sequera é certo polos resultados electorais autonómicos, pero a enquisa proba que somos moitos más, que unha cuarta parte deste país cre nun ideario que defende as nosas posibilidades, o noso autogoberno, a nosa cultura e o noso idioma, ese que a eles parece que lle molesta tanto”, engade Táboas.

Noutros ámbitos do nacionalismo ou a esquerda tamén foi comentado o dato do CIS. O analista político e ex parlamentario Anxo Guerreiro asegura que “os publicado amosa que o nacionalismo está máis implantado en termos sociais que electorais, o que ten que facer pensar ao Bloque, porque nos comicios baixou a mínimos históricos se se mira o voto nacionalista en conxunto. O problema é que sen un BNG forte non hai alternativa progresista á dereita, porque moita xente vota nacionalista ou non vota”.

Pola súa banda, o ex dirixente nacionalista Camilo Nogueira afirma que “nunca houbo tanta conciencia nacional como agora, pero a dirección do Bloque mantén a súa cabezonería e non dá a resposta axeitada a esa demanda”.