O PP rexeita a gratuidade universal dos libros de texto por "populista"

 O grupo parlamentario do PPdeG rexeitou hoxe senllas propostas, presentadas polo BNG e o PSdeG na comisión de educación e cultura, para manter o programa de gratuidade dos libros na educación pública, o cal cualificaron como "populista" e "anti-social". O voceiro do PPdeG na comisión, Ramón Rodríguez, asegurou que o novo programa que vai impulsar a Xunta será "máis xusto" e "máis solidario" e que lles dará prioridade "ás necesidades das familias máis necesitadas".

Rodríguez afirmou que o anterior sistema de gratuidade dos libros, desenvolvido polo Goberno do Bipartito, ao que cualificou como "populista e antisocial", provocou un "efecto perverso" tanto no sector editorial, pedagóxico e, incluso, na sociedade, ao instalar un modelo de "café para todos" que prexudicaba as rendas máis baixas.

Por este motivo, anunciou que o novo modelo utilizará os niveis da renda como "un elemento diferenciador", co obxectivo de garantir unha gratuidade "real e efectiva" dos libros de texto, polo que, na súa opinión, "Galicia vai aplaudir" esta medida.

Non obstante, o voceiro socialista, Antonio Meijón Couselo, afirmou que esta iniciativa implica un "paso atrás", posto que se trataba "da medida máis valorada" pola sociedade das implantadas durante a pasada lexislatura.

Neste sentido, Couselo inquiriu á Xunta a explicar se vai aplicar estes criterios económicos a outros departamentos, como o de Sanidade, polo que preguntou se "as receitas se van dar en función da renda". Por este motivo, o voceiro socialista instou o presidente da Xunta, Alberto Núñez Feijóo, a "volver ao carril correcto" que "neste caso é o da esquerda, porque é onde a sociedade adianta nos dereitos universais", afirmou.

Así mesmo, suxeriulle ao Executivo que "consulte os pais" sobre a gratuidade dos libros, así como sobre o reagrupamento do alumnado nalgúns centros rurais.

Pola súa banda, a representante do BNG na comisión, Carme Adán, acusou o conselleiro de Educación, Jesús Vázquez, de non comparecer diante do Parlamento para explicar as súas propostas, pero si "de ocupar portadas" e dar "grandes titulares".

Adán asegurou que o PP xa intentou, durante a pasada lexislatura, "eliminar a gratuidade dos libros" o que, na súa opinión, "causa grandes desaxustes sociais", xa que impide garantir "o acceso en igualdade de condicións" de todo o alumnado. Así mesmo, criticou a "parálise" da Consellería de Educación, xa que "hai ao redor de 82.000 familias esperando" a que se explique como se vai xestionar o programa da gratuidade dos libros", se é que "vai haber programa", advertiu.

A este respecto, o voceiro socialista manifestou que a Consellería está actuando "con nocturnidade e aleivosía

Carme Adán, do BNG, lembrou á Consellería de Educación que hai "máis de 82.000 familias en Galicia agardando " que a Xunta defina a súa política en materia educativa porque "aínda non saben qué vai pasar cos libros de texto".

Guillermo Meijón, do PSOE, acusou á Xunta de retirar a gratuidade dos libros "con nocturnidade e alevosía".  O socialista pediu ao PP, "tan amigo das enquisas" que "consulte tamén aos pais se queren libros de texto gratuitos ou agrupar aos alumnos nun número que nin sequera Manuel Fraga se atrevía".

Onte mesmo o presidente da Xunta, Núñez Feijóo, prometeu manter "a maior cantidade posible de gratuidade" ao tempo que a asegurou para as rendas baixas e medias "sen nengún límite nin excepción". Recoñeceu, ademáis, que non adoptara aínda medidas concretas sobre o programa impulsado polo bipartito.