O fiscal Carlos Varela, fillo adoptivo de Cangas

O Concello de Cangas celebrou onte unha homenaxe ao fiscal xefe do Tribunal Superior de Xustiza de Galicia, Carlos Varela, ao que nomearon fillo adoptivo da vila. Varela, natural do Carballiño pero veciño do barrio cangués de San Roque, recibiu o recoñecemento porque, segundo se indica no texto da moción que acordou o seu nomeamento, “o seu labor e exemplo dignificou a lingua galega e combateu os complexos lingüísticos tan chantados nas mentalidades dos xustizables e axentes xudiciais”.

Carlos Varela mantivo desde o comezo da súa actividade profesional en Vigo a comezos dos anos 80 unha manifesta preocupación pola presenza da lingua galega na Xustiza. Varela tamén se implicou en entidades como as fundacións Premios da Crítica ou Peña Novo.