Táboas pide “reformular” o BNG e “achegalo” á sociedade

“Un exercicio profundo de reformulación” para rematar co “cortocircuíto entre a mensaxe do Bloque e a sociedade”. Este é, a xuízo da coordenadora da Executiva do BNG, Teresa Táboas, o camiño que a formación nacionalista debe seguir nos vindeiros anos.

Co obxectivo de lograr que “o 23 por cento de galegos que se define nacionalista –en referencia á ultima enquisa do CIS– poida ser votante do BNG”, Táboas apostou, nunha entrevista concedida a Europa Press, por “actualizar” as “propostas e liñas programáticas” da formación frontista.

Dende o punto de vista da ex conselleira de Vivenda, a “mensaxe” nacionalista “moitas veces chega distorsionada pola vontade dalgúns sectores”. Así, di, “o que temos que facer é buscar os medios para que chegue con clareza, esa é agora a prioridade”.

Esta folla de ruta debera, segundo Táboas, levar ao BNG a superar o “importante impasse” que, di, supuxeron “os últimos procesos electorais”, en referencia ás pasadas eleccións autonómicas e europeas.

FUTURO ORGANIZATIVO

Precisamente eses retrocesos electorais son, dende a perspectiva “persoal” da tamén deputada nacionalista, motivo suficiente como para “adiantar” a vindeira Asemblea Nacional, que debera celebrarse nun prazo máximo de dous anos.

“Eu, persoalmente –apunta– creo que se tería que adiantar, pero é unha cuestión que teremos que debater internamente”. Será “a organización” a que decida cal é o momento “máis axeitado” para o cónclave.

Tamén a nivel interno, Teresa Táboas avoga por situar sobre a mesa o propio modelo organizativo do BNG. Se ben coida que a “actualización” da “mensaxe” debe priorizarse sobre calquera outra cuestión, a nacionalista non desbota discutir sobre “se se debe continuar co modelo frontista ou camiñar doutro xeito”

Este, entre outros, será un dos debates que propicie a plataforma liderada polo voceiro parlamentario do Bloque, Carlos Aymerich, da que a propia Táboas forma parte. Despois de concorrer á pasada Asemblea Nacional, Táboas confirma que, tal e como avanzara Xornal de Galicia, ‘Máis BNG’ se “organizará como corrente interna no seo do BNG.

Nesa mesma perspectiva do futuro da formación, preguntada pola posibilidade de que unha muller encabece o proxecto nacionalista a partir da vindeira Asemblea, Táboas non desbota un escenario na que ela mesma poida facelo, sempre e cando a “organización” o “pida”. “Teño un compromiso co nacionalismo. Se mo pide aceptaría, pero a formación deberá decidir”.

CRÍTICAS Á XUNTA

Xa en clave galega, Teresa Táboas móstrase especialmente crítica cos primeiros pasos do novo Goberno galego, cuxas intencións, di, pasan por “converter os símbolos galegos en garabatos”, en referencia ás súas medidas lingüísticas.

“A lingua –afirma–non é de ninguén, foi lamentable escoitar que o galego é unha barreira”, di, en referencia ao pasado pleno parlamentario. “Todos –conclúe– temos a obriga de defender o patrimono”.