Dous médicos negan a atención en galego a un paciente en Ferrol

A Mesa pola Normalización Lingüística vén de denunciar dous novos casos de suposta “discriminación lingüística” no Sergas de Ferrol, ocorridos a finais de maio nos Hospitais Arquitecto Marcide e Naval. Dous facultativos diferentes negáronse a atender e a falar en galego a un paciente que llo solicitou de xeito formal, facendo uso de seu dereito a percibir a atención médica “propia do Servizo Galego de Saúde”.

O enfermo acudiu en primeiro lugar a Urxencias do Arquitecto Marcide. Pese a que na sala de espera a maioría da xente se expresaba en galego, ó pasar a porta da consulta, denunciou que “a presenza do idioma desapareceu”. O médico que o atendeu se negou reiteradamente a falarlle en galego. E a situación se reproduciu de novo na área de Oftalmoloxía do Hospital Naval.

O enfermo non só sufriu a negativa dos dous médicos a atendelo en galego. Ó solicitar un formulario de queixa, atopouse con que só se lle facilitaba un modelo en castelán, en contra do disposto na Circular 5/97 da Secretaría Xeral Técnica da Consellería de Sanidade.

O afectado puxo en coñecemento da xerencia territorial do SERGAS e da propia consellería o trato recibido, ademáis de dirixirse á Mesa pola Normalización Lingüística, que xa transmitiu a reclamación ás instancias correspondentes.

Pero non é a primeira vez que en Ferrol se rexistra un caso de discriminación lingüística nas dependencias sanitarias. O pasado mes de decembro, unha médica do centro de saúde Fontenla Maristany negou a asistencia en galego a un paciente. Pese a que en dúas ocasións requeriu a “atención oral, a resposta, sempre foi negativa”.

“O tema do Sergas na comarca é terrorífico, temos máis casos, hai hospitais como o de Caranza, concertado ca sanidade pública, nos que parece que estás nun centro de Toledo”, asegura Carlos Outeiro, o responsable da Mesa na zona de Ferrol. “Os traballadores da sanidade están a cobrar do erario público galego, así que teñen que respectar os dereitos dos galegos, non poden facer o que queiran”, puntualiza. Porén, lamenta que as queixas da Mesa sempre caian en saco roto na Área Sanitaria de Ferrol.

A Mesa lembra que a Lei 3/1983 establece que os poderes públicos de Galicia garantizarán o uso normal do galego e que “ninguén poderá ser discriminado por razón de lingua”. Pero é máis, o Plan Xeral de Normalización da Lingua Galega –aprobado por unanimidade no Parlamento de Galicia en setembro de 2004– determina o principio da “oferta positiva” nas relacións entre a administración e os particulares. Deste modo, a lingua inicial ten que ser o galego, para favorecer o uso do idioma propio.

Ante isto, Carlos Outeiro, anima a todos os cidadáns a poñérense en contacto coa Liña do Galego para transmitir calquera discriminación ou vulneración dos seus dereitos lingüísticos e para que se den a coñecer “todas as posibles situacións nas que o uso normal do galego é imposible ou unha carreira de obstáculos”.